راچڵەكین-
وەزارەتی سامانە سروشتییەكانی حكومەتی هەرێمی كوردستان، هێرشە درۆنییەكەی سەر كێڵگەی نەوتی سەرسەنگ لە سنووری دهۆك بە " تیرۆرستی" ناودەبات.
ئەمڕۆ سێشەممە 15ی تەمووزی 2025 وەزارەتی سامانە سروشتییەكان لەراگەیەندراوێكدا ئاماژەی بەوەكردووە:" سەر لەبەیانی ئەمڕۆ رۆژی سێشەممە (15)ی تەمووزی 2025 لە ڕێگەی درۆنی بۆمبڕێژكراو هێرشێكی تیرۆرستی كرایە سەر كێڵگەی نەوتی سەرسەنگ لە ناحیەی چەمانكێ لە پارێزگای دهۆك . هێرشەكە هیچ زیانێكی گیانی نەبووە."
"ئەم هێرشە دوای ئەو هێرشەی دوێنێ ئێوارەوە دێت كە لە ڕێگەی دوو درۆنی بۆمبڕێژكراو هێرشكرایە سەر كێڵگەی نەوتی خۆرمەڵە لە پارێزگای هەولێر."
لە راگەیەندراوەكەدا هاتووە:" وەزارەتی سامانە سروشتییەكان ئەم جۆرە هێرشانە بۆ سەر ژێرخانی ئابووریی هەرێمی كوردستان بەتووندی ئیدانە و شەرمەزار دەكات."