راچڵەكین-

بەهۆی گواستنەوەی نەوت لە ئێران و ڕووسیاوە، وەزارەتی گەنجینەی ئەمریكا سزای بەسەر زیاتر لە 115 كەس و دامەزراوەدا سەپاند.

وەزارەتی گەنجینەی ئەمریكا، ڕاگەیاندراوێكی سەبارەت بە تۆڕی گواستنەوەی پەیوەندیدار بە ئێران بڵاوكردەوە.

لە ڕاگەیاندراوەكەدا ئاماژە بەوە كراوە، نووسینگەی پاراستنی سەروەت و سامانی بیانی (OFAC)، زیاتر لە ١١٥ كەسایەتی، دامەزراوە و كەشتی لە 17 شوێنی جیاوازی كردووەتە ئامانج لەنێویشیان وڵاتانی ئیمارات، هیندستان، توركیا، سەنگاپورە و سویسرا، كە پەیوەندیان بە گواستنەوەی نەوت و بەرهەمە نەوتییەكانەوە هەیە لە ئێران و ڕووسیاوە. 

هەروەها لە ڕاگەیاندراوەكەدا باس لەوە كراوە لە ساڵی ٢٠١٨ەوە تا ئێستا، ئەمە گەورەترین هەنگاوی سزادانە بەسەر ئێراندا.

سكۆت بیسێنت، وەزیری گەنجینەی ئەمریكا، ، ئاماژەی بەوە كرد كە ئەو سزایانە، پاراستنی ئاسایشی ئەمریكا لە پێش هەموو شتێكەوە دادەنێن.