راچڵەكین -

دەزگای دژەتیرۆری عیراق دەستگیركردنی چەندین تیرۆریستی لەچەند پارێزگایەكی عیراق راگەیاند، كە یەكێك لە تیرۆریستەكان بە هاوكاری دەزگای ئاسایشی هەرێم، لەسنووری پارێزگای سلێمانی دەستگیركراوە.

لە راگەیەندراوێكدا كە ئەمڕۆ سێشەممە 12-8-2025 بڵاوكراوەتەوە، دەزگای دژەتیرۆری عیراق ئاشكرایكردووە لەمیانی چەند ئۆپەراسیۆنێكدا بەئامانجی ریشەكێشكردنی پاشماوەكانی تیرۆریستانی داعش، هێزەكانیان پێنج تیرۆریستی داعشیان لەسنووری پارێزگای نەینەوا دەستگیركرد و لە ئۆپەراسیۆنێكی هاوشێوەشدا لە پارێزگای كەركوك، چوار چەكداری ئەو گروپە تیرۆریستەیان دستگیركرد، هاوكات لە پارێزگای سەڵاحەدینیش چەكدارێكی داعش دەستگیركرا.

دژەتیرۆری عیراق ئاماژەی بەوەشكردووە، لە پرۆسەیەكدا بە هەماهەنگی و هاوكاریی دەزگای ئاسایشی هەرێم، توانییان تیرۆریستێكی داعش لەسنووری پارێزگای سلێمانی دەستگیر بكەن.

لە بەشێكی راگەیەندراوەكەدا ئاماژە بەوەكراوە، لە ئۆپەراسیۆنەكانی دژەتیرۆردا لەسنووری پارێزگاكانی نەینەوا، كەركوك و سەڵاحەدین، چەندین حەشارگەی تیرۆریستان لەناوبران، كە بڕێكی زۆر چەك و تەقەمەنی جۆراوجۆریان تێدا حەشاردرابوو.