راچڵەكین -
بەهۆی دەستپێكردنی تاقیكردنەوە گشتییەكانی خولی دووەم، وەزارەتی گواستنەو گەیاندن بڕیاریدا ئەو رۆژانەی تاقیكردنەوەی تێدا ئەنجام دەدرێت، لە كاتژمێر (٦:٣٠)ی بەیانی تاوەكو كاتژمێر (٧:٤٥)ی بەیانی هێڵەكانی ئینتەرنێت رابگیرێت.
وەزارەتی گواستنەوە و گەیاندنی حكومەتی هەرێم بڵاویكردەوە، لەسەر داوای وەزارەتی پەروەردەی حكومەتی هەرێمی كوردستان كە بەنوسراوی فەرمی ئاراستەی وەزارەتمان كراوە، داواكراوە لە رۆژانی تاقیكردنەوەكان، ئینتەرنێت رابگرین، لەبەر بەرژەوەندی گشتی و رێگریكردن لە دیاردەی گزی كردن (غش) لە تاقیكردنەوەكانی خولی دووەم، كە بەیانی رۆژی شەممە ٢٣-٨-٢٠٢٥ دەستپێدەكات، بە شێوەی رۆژێك نا رۆژێك تا بەرواری ٨-٩-٢٠٢٥ بەردەوام دەبێت.
وەزارەتی گواستنەوە ئاماژەی بەوەكردووە، تەنها لە ڕۆژانی تاقیكردنەوەكان هێڵەكانی ئینتەرنێت و هەموو جۆرە نامەیەكی (MMS) رادەگیرێت، لە كاتژمێر (٦:٣٠)ی بەیانی تاوەكو كاتژمێر (٧:٤٥)ی بەیانی.
لە راگەیەندراوەكەدا ئەوە روونكراوەتەوە كە ئەو شوێنانەی دیاریكراون كە پێویستە لە هەموو حاڵەتێكدا ئینتەرنێتیان هەبێت، بە هەمان میكانیزمی پێشوو بێت و ئینتەرنێتیان بەردەوام دەبێت.