راچڵەكین-

وەزارەتی كارەبی حكومەتی هەرێمی كوردستان لەبارەی كەمبوونەوەی كارەبای 24 كاتژمێری لە وەرزی زستاندا روونكردنەوە دەدات

ئەمڕۆ یەكشەممە 26ی تشرینی یەكەمی 2025 وەزارەتی كارەبا بڵاویكردووەتەوە:"هەواڵی كەناڵێكی ڕاگەیاندن لەسەر پڕۆژەی كارەبای 24 كاتژمێری ڕەت دەكەینەوە، ئەم پڕۆژە خزمەتگوزارییە  یەكێك لە دەستكەوت و پڕۆژە خزمەتگوزارییەكانی كابینەی نۆیەمی حكومەتی هەرێمی كوردستانە و،  ڕۆژ لە دوای ڕۆژ فراوانتر دەبێت و تا كۆتایی ساڵی 2026 هەموو ناوچەكانی هەرێم دەگرێتەوە."

ئەوەش روونكراوەتەوە:"بڵاوكردنەوەی هەواڵی چەواشەكاری لە هەڵمەتی هەڵبژاردندا، یاریكردنكردنە بە هەست و سۆزی هاووڵاتیان."

وەزارەتی كارەبا دەڵێت:" بە مافی یاسایی خۆی دەزانێت لە دادگا و كۆمسیۆنی هەڵبژاردنەكان سكاڵا دژی ئەو كەناڵانە تۆمار بكات كە هەواڵی ناڕاست و دوور لە بنەماكانی ڕاگەیاندن بڵاو دەكەنەوە."

پێشتر چەند میدیایەكی هەرێمی كوردستان بەناوی ئومێد ئەحمەد، وتەبێژی وەزارەتی كارەبای هەرێم بڵاویانكردبوەوە: "بۆ وەرزی زستان هەوڵدەدەین كارەبای ٢٤ كاتژمێری بدرێت بە هاوڵاتییان بەڵام تا ئێستا دڵنیانین، ئەگەر نەتوانرا گرێبەستمان لەگەڵ خاوەن مۆلیدەكان كردووە مۆلیدەكانیان كار پێبكەنەوە".