راچڵەكین-
نێردەی تایبەتی ئەمریكا بۆ عیراق، دوای كۆتایی هاتنی پرۆسەی هەڵبژاردنی خولی شەشەمی ئەنجوومەنی نوێنەرانی عیراق، پەیامێكی پیرۆزبایی بڵاویكردەوە.
مارك ساڤایا، لەپەیامەكەیدا دەڵێت، ئەنجامدانی هەڵبژاردنی پەرلەمانی، هەنگاوێكی گرنگە بۆ پتەوتركردنی دیموكراتی و سەقامگیری لەعیراقدا.
نێردەی تایبەتی ئەمریكا بۆ عیراق ئاماژەی بەوەكردووە، جارێكی تر گەلی عیراق سەلماندی كە پابەندی ئازادی، سەروەری یاساو بونیاتنانی دامەزراوەكانی دەوڵەتێكی بەهێزە.
مارك ساڤایا روونیكردووەتەوە:" دەستخۆشی لە محەممەد شیاع سودانی، سەرۆكوەزیران و حكومەتەكەی دەكەم كە پەرۆشبوون بۆ ئەوەی هەڵبژاردن لەوادەی دیاریكراوی خۆیدا بەڕێوەبچێت، ئەوەش بەڵگەیەكی روونە لەسەر ئەوەی عیراق بەرێگایەكی سەروەری و گەشەپێداندا هەنگاو دەنێت."
مارك ساڤایا- نێردەی تایبەتی ئەمریكا بۆ عیراق بەم شێوەیە كۆتایی بەپەیامەكەی هێناوە: " ئەمریكا بەبەهێزی پابەند دەبێت بەپشتیوانیكردن لە سەروەری عیراق و هەوڵەكانی چاكسازی، سنووردانان لەبەردەم دەستوەردانە دەرەكییەكان و گروپە چەكدارەكان، چاومان لەوەیە لەگەڵ حكومەتی داهاتووی عیراق كاربكەین بۆ قوڵكردنەوەی هاوبەشییە ستراتیژییەكانمان لەبوارەكانی ئاسایش، وزەو گەشەپێدان و بونیاتنانی داهاتوویەكی سەقامگیر بۆ هەموو عیراقییەك."