راچڵەكین-

سەرۆكی فینلاند لەبارەی تێڕوانین لە كۆچبەران و كاریگەری لەسەر وڵاتەكەی دەڵێت:" كۆچ پایەیەكی سەرەكییە بۆ بەردەوامی گەشەی ئابووری و كۆمەڵایەتی لە فنلاند."

ئەلیكساندەر ستووب، لەوتەیەكدا بۆ ژمارەیەك لەخوێندكارانی زانكۆ لە رۆژهەڵاتی ئەو وڵاتە كە رۆژنامەی ئیلتالهتی بڵاویكردووەتەوە، رایگەیاند:" لەماڵەكەی خۆمدا كۆچبەر دەژی"، (مەبەست لە هاوسەرەكەیەتی)، لەئاماژەیەكدا بۆ ئەوەی هەمەڕەنگی بەشێكە لە ژیانی رۆژانەیی و  گوزارشت لەپابەندیی خۆی دەكات بە كۆمەڵگەیەكی فرە رۆشنبیری و كلتوری.

سەرۆكی فینلاند، هۆشداریدا لەوەی رەتكردنەوەی بەرامبەر لەكۆمەڵگەكەیدا ئەگەری هەیە ببێتە هۆی گۆشەگیركردنی كۆمەڵگەكەو دووركەوتنەوەی لە پێكەوەژیانی نیشتمانی.

ئەلێكساندەر ستووب، بەم دەستەواژەیە كۆتایی بەووتەكەی هێنا" دەبێت فێری قبوڵكردنی جیاوازی و هەمەڕەنگی بین، كۆچ هەڕەشە نییە، بەڵكو هەلێكە بۆ گەشەو بەرەوپێشچوون"  لەپەیامێكی رووندا بۆ داهاتووی فینلاند كە بەئاڕاستەی كۆمەڵگەیەكی هەمەرەنگ  هەنگاو دەنێت.