راچڵەكین -
مەكتەبی سیاسی یەكێتیی نیشتمانیی كوردستان، لەبارەی لافاوەكەی هەردوو قەزای چەمچەماڵ و ناحیەی لەیلان، راگەیەندراوێك بڵاودەكاتەوەو داوا دەكات هەماهەنگی و تەگبیری هاوبەشی حكومەتی هەرێم، پارێزگا و ئیدارە سەربەخۆكان و دەزگا رەسمییەكانی حكومەتی فیدڕاڵی لە دابینكردنی ئامێر و كەرەستەكانی پێویست بگاتە حاڵەتی ئامادەباشی تەواو و بە زوویی كۆنترۆڵی زیانەكان بكرێن.
دەقی راگەیەندراوەكە:
راگەیەندراوێك لە مەكتەبی سیاسی یەكێتیی نیشتمانیی كوردستانەوە
بەداخەوە كە ئەمڕۆ لەم شەپۆلی بارانبارین و لافاوەی شارەكانی كوردستانی گرتووەتەوە، زیانێكی زۆر بەر ماڵ و حاڵی هاووڵاتیان و چەندین شوێنی گشتی كەوتووە، بەتایبەتی لە شاری چەمچەماڵ لە هەرێم و سنووری لەیلان لە كەركوك گەیشتە گیان لەدەستدان و خنكان.
وێڕای ئاڕاستەكردنی ماتەم و پەژارەی خۆمان بۆ كەسوكاری كۆستكەوتووان، دەستخۆشی لە تیمەكانی فریاگوزاری و دەزگا پەیوەندیدارەكان دەكەین كە هیممەت بۆ چارەسەری لێكەوتەكانی لافاوەكە دەكەن، بە پەرۆشەوە داواكارین هەماهەنگی و تەگبیری هاوبەشی حكومەتی هەرێم، پارێزگا و ئیدارە سەربەخۆكان و دەزگا رەسمییەكانی حكومەتی فیدڕاڵی لە دابینكردنی ئامێر و كەرەستەكانی پێویست بگاتە حاڵەتی ئامادەباشی تەواو و بە زوویی كۆنترۆڵی زیانەكان بكرێن، بەتایبەتی كە ئەم شەپۆلە ماوەیەك بەردەوام دەبێت و پێویستی بە كۆششی دەستەجەمعی و فریاگوزاری دەستبەجێ هەیە.