ماوەی هەفتەیەکە خۆپیشاندان لە زۆرینەی شار و شارۆچکەکانی ئێران دژی بارودۆخی ئابووری وڵاتەکە بەردەوامە و بەگوێرەی سەرچاوە هەواڵییەکان، شەوی رابردوو بەشێکی زۆری خۆپیشاندەران لەسەر شەقامەکان رۆژیان کردووەتەوە.
لە چەند شوێنێک خۆپیشاندانەکان گرژی و ئاڵۆزی لێکەوتووەتەوە و بووەتە هۆی گیان لەدەستدان و بریندار بوونی چەند کەسێک، سەرباری ئەوانەش، لێدوانێکی سەرۆکی ئەمریکا زیاتر سەرنجی میدیا جیهانییەکانی بەلای خۆپیشاندانەکانی ئێران و هەڕەشە ئەگەرییەکانی ناوچەکەدا راکێشا و کاریگەری خستە سەر هەڵوێستی تاران سەبارەت بە خۆپیشاندەرانی سەر شەقام.

دوێنێ هەینی دۆناڵد ترەمپ سەرۆکی ئەمەریکا لە پەیامێکیدا ئاشکرایکرد: ئەگەر حکومەتی ئێران پەنا بۆ کوشتنی خۆپیشاندەران ببات ئەوا واشنتۆن بێدەنگ نابێت.

پەیامەکەی سەرۆکی ئەمەریکا دەسەڵاتدارانی ئێرانی توڕەکرد و هەر زوو عەلی لاریجانی سکرتێری ئەنجومەنی باڵای ئاسایشی نیشتمانی ئەو وڵاتە وتی: هەڵوێستەکانی بەرپرسانی واشنتۆن و تەلئەبیب پشتی پەردەی رووداوەکانی ئەم دواییەی وڵاتەکەمانی روونکردەوە.

لە هەڕەشەیەکی روون و ئاشکراشدا، محەمەد باقر قالیباف سەرۆکی پەرلەمانی ئێرانیش رایگەیاند: لە ئەگەری هەر هێرشێکی دوژمنکاریدا، تەواوی بنکە و هێزەکانی ئەمەریکا لە رۆژهەڵاتی ناوەڕاست دەکرێتە ئامانج.

سەعید مونتەزر مەهدی وتەبێژی فەرماندەیی ئاسایشی نیشتمانی ئێرانیش ئاماژەی بەوەکرد: ئەفسەرانی پۆلیس رێگە بەو رووداوانە نادەن کە دوژمنان مەبەستیانە و دەیانەوێت لە رێگەیەوە خۆپیشاندانی مەدەنی بۆ ئاژاوەگێڕی بەکاربهێنن.

لەلایەکی دیکەوە داواکاری گشتی ناوچەی لوڕستان کە چەند رۆژێک پێش ئێستا پێکدادانی توند لەنێوان هێزە ئەمنییەکان و خۆپیشاندەران تیایدا روویدا وتی: بە توندی مامەڵە لەگەڵ ئاژاوەگێڕان دەکرێت.

ئەم پێشهاتانە لەکاتێکدایە، کە پەیوەندی نێوان تاران و تەلئەبیب گەیشتووەتە خراپترین ئاستی خۆی لەدوای شەڕی 12 رۆژەوە و سەرچاوە جیهانییەکان جەخت لەوەدەکەەنەوە، کە دەستپێکردنەوەی شەڕی نێوان ئەو دوو وڵاتە زیاتر لە هەر کاتێک نزیکە لە روودان.

هەفتەی رابردوو بنیامین ناتانیاهو سەرۆکوەزیرانی ئیسرائیل سەردانی کۆشکی سپی کرد  و بەگوێرەی راپۆرتێکی رۆژنامەی تایمز، ئامانجی سەردانەکەی ناتانیاهو هەوڵدانە بۆ بەدەستهێنانی رەزامەندی واشنتۆن سەبارەت بە هێرشکردنە سەر دامەزراوە مووشەکییەکانی ئێران.