راچڵەكین -

پۆلیسی هەڵەبجە دەستگیركردنی تۆمەتبارێكی راگەیاند كە دزی لەماڵی هاووڵاتییەك كردبوو.

بەگوێرەی راگەیەندراوێكی بەڕێوبەرایەتی پۆلیسی پارێزگای هەڵەبجە، كە ئەمڕۆ یەكشەممە 4-1-2026 بڵاوكراوەتەوە، دوای ئەوەی هاووڵاتییەك سكاڵای لەبەشی پۆلیسی نەهێشتنی تاوان تۆماركرد كە دزێك چووەتە سەر ماڵەكەی و چەند پارچە ئاڵتونێك و جوانكاریی خانمان و كامێرایەكی چاودێری دزیوە، پۆلیس دەستی بە لێكۆڵینەوە و بەدواداچوون كرد و لەڕێگەی مەفرەزەكانیانەوە  توانرا  تۆمەتبارێك بەناوی (ه. ل.  ف تەمەن 28 ساڵ) دەستگیر بكرێت.

لە راگەیەندراوەكەدا ئاماژە بەوەكراوە، تۆمەتبارە دەستگیركراوەكە، كە پیشە كاسبە، لەبەردەم دادوەری لێكۆڵینەوە دانی بەتاوانەكەیدا ناوەو بەپێی ماددەی 446 لە یاسای سزادانی عیراقی، راگیراوە.