راچڵەكین-

ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی، هەڵەبجە و هەردوو ئیدارەی راپەڕین و گەرمیان، داهاتی ئەم هەفتەیەی بڵاوكردەوە.

بەگوێرەی ئەو داتایانە بێت كە ماڵپەری شەفافیەت بڵاویكردوونەتەوە، داهاتی نانەوتی  سلێمانی، هەڵەبجە و هەردوو ئیدارەی راپەڕین و گەرمیان لە 3 تا 9ی 1ی 2026 بڕی (3) ملیارو (217) ملیۆن و (915)هەزار و (309)دینار بووە، لە (80%)ـی داهاتەكە نەختینەیەو (20%)ی چەكە.

داهاتەكە بەراورد بە هەفتەی رابردوو بەرێژەی  12.164% كەمیكردووە كە دەكاتە بڕی 445 ملیۆن دینار، بەجۆرێك داهاتی نانەوتی لە 27/12/2025 تا  2-1ی 2026 بریتیی بوو لە (3) ملیارو (663) ملیۆن و (555) هەزارو (250) دینار.

ماڵپەڕی شەفافیەت لە 8 بەش پێكدێت و لەلایەن نووسینگەی قوباد تاڵەبانی جێگری سەرۆكی حكومەت سەرپەرشتی دەكرێت و دروشمەكەی "بە سیستمكردن و دیجیتاڵكردنی خزمەتگوزارییەكانی هاوڵاتییان لە دامودەزگاكانی حكومەت"ـە.