راچڵەكین-

بەڕێوبەرایەتی خۆسەری باكوور و رۆژهەڵاتی سوریا، دوای ڕاگەیاندنی ئاگبەست لەهەردوو گەڕەكی شێخ مەقسودو ئەشرەفیەی كورد نشین لە حەلەب و كۆنترۆڵكردنی ئەو دوو گەڕەكە لەلایەن سوپای سوریای عەرەبی و گروپە چەكدارەكانی سەر بە توركیا راگەیەندراوێكی بڵاوكردەوە.

ئەمڕۆ یەكشەممە 11ی كانوونی دووەمی 2026 بەڕێوبەرایەتی خۆسەری باكوور و رۆژهەڵاتی سوریا بڵاویكردەوە، لە 6ی 1ی 2026، گەڕەكی شێخ مەقسوود و ئەشرەفییە لە حەلەب كەوتە بەر پەلامارێكی سەربازی بەرفراوانی گروپە چەكدارەكانی سەر بە وەزارەتی بەرگری حكومەتی كاتی سوریا، ئەوەش لە چوارچێوەی پلانێكی توركیا و بە پاڵپشتیی ڕانەگەیەندراوی زلهێزە نێودەوڵەتی و ناوچەییەكان.

ئەم هێرشە شەش ڕۆژی لەسەریەك بەردەوام بوو، لەناوەڕۆكیشدا هێرشێكی چەند دەوڵەتێك بوو بۆ سەر دوو گەڕەكی نیشتەجێبوون، كە تێیدا جۆرەها چەكی قورس لە دژی چەكی تاكەكەسی سادە بەكارهێنرا، هێرشێك كە هەزاران ئەندامی گروپی چەكداری تێدا بەشداربوون، لەنێویاندا چەكدارانی داعش، دژی سەدان كارمەندی هێزەكانی ئاسایشی ناوخۆ. شەڕێكی تەواو نابەرامبەر، دوور لە بەها مرۆییەكان و ئەخلاق و یاساكانی جەنگ كە لە ئاستی نێودەوڵەتیدا دانپێدانراون.

"هەڤاڵانمان لە هێزەكانی ئاسایشی ناوخۆ بە بەرخۆدانێكی مێژوویی و قارەمانانە رووبەڕووی ئەم دەستدرێژییە بوونەتەوە و بەرگرییان لە خەڵكی سڤیل و گەلەكەمان لە هەردوو گەڕەكەكەكرد، بەرزترین واتاكانی فیداكاری و قوربانیدانیان نەخشاند. فەرماندە زیاد و ئازاد دڕەندەترین هێرشەكانیان شكاندو بە ئیرادەیەكی پۆڵاینەوە سەركردایەتی بەرخۆدانیان كرد، تا دەگاتە هەڤاڵانمان هاوار، دلبیرین، ڤیان، فرشین، رۆژبین، و دەنیز، كە بە كردەوەی فیداكارییەكانیان بەرزترین پلەی پابەندبوونیان بە بەهاو دۆزی گەلەكەیان بەرجەستە دەكرد. قوربانیدانەكانیان بۆ هەمیشە لە ویژدان و هزری گەلەكەماندا بە نەمری بمێنێتەوە."

دەستبەسەرداگرتنی ئەو دوو گەڕەكە لەلایەن گروپە چەكدارەكانی سەر بە وەزارەتی بەرگرییەوە ناكرێت بە سەركەوتن وەسف بكرێت؛ بەڵكو كردەوەیەكی خیانەت و تاوانێكی گەورەیە كە لەلایەن دەسەڵاتێكەوە ئەنجام دەدرێت كە بانگەشەی نوێنەرایەتی دەوڵەت دەكات:" لەكاتێكدا هاووڵاتیانی خۆی دەكوژێت و شكۆیان پێشێل دەكات، دەسەڵاتێك كە بانگەشەی پابەندبوون بە ئیسلامەوە دەكات، لەبەرامبەردا سوكایەتی بە تەرمی مردووەكان ئەنجام دەدات و بەڕوونی تاوانی جەنگ ئەنجامدەدات.

"هەر دەسەڵاتێك پشت بە دەوڵەتێكی تر ببەستێت بۆ چەوساندنەوەی گەلەكەی خۆی، شەرعیەتی خۆی لەدەست دەدات، بەبێ گوێدانە پاڵپشتی نێودەوڵەتی، چونكە خەڵك بەتەنها سەرچاوەی شەرعیەتن. بەكارهێنانی تانك و تۆپخانەی قورس لەدژی ناوچە نیشتەجێبووەكان، لاوازی و ترسی ئەم ڕژێمە پشتڕاست دەكاتەوە، نەك بەهێزی، و وەك پەڵەیەك لەسەر مێژووی سوریا دەمێنێتەوە." وەك لەڕاگەیەندراكەوەی بەڕێوەبەرایەتی خۆسەردا هاتووە.

"دووپاتی دەكەینەوە، ئەو كۆمەڵكوژی و پێشێلكاری و سوكایەتیانەی بەرامبەر گەلەكەمان و شەهیدەكانمان دەكرێن بێ سزا تێناپەڕن و برینەكانی لە ویژدانماندا زیندوو دەمێننەوە تا لێپرسینەوە لەگەڵ بەرپرسان دەكرێن."

 بەڕێوەبەرایەتی خۆسەر دەڵێت:" لەبەر ڕۆشنایی ئەو پێشێلكارییە جددیانەی لە چەند ڕۆژی ڕابردوودا ڕوویانداوە، داوا لە ڕێكخراوە نێودەوڵەتی و مافی مرۆڤ و مرۆییەكان دەكەین كە بەرپرسیارێتی خۆیان لە ئەستۆ بگرن و چاودێری بارودۆخی مرۆیی و ئەمنی لە گەڕەكەكانی شێخ مەقسوود و ئەشرەفیە بكەن، دوای ئەو پەلامارە دڕندانانە، پێشێلكردنی كەرامەتی مرۆڤ، لەسێدارەدانی مەیدانی، تاوانی جەنگ، پاكتاوی نەتەوەیی و گۆڕانی دیمۆگرافی كە گەلەكەمان تووشی دەبێت. هەروەها داوای جێگیركردنی هێزێكی نێودەوڵەتی لەو دوو گەڕەكە دەكەین بۆ ڕێگریكردن لە ئەنجامدانی تاوانی نوێ، لەبەرچاوگرتنی نەبوونی متمانە بە هێزە ئەمنییەكانی دەوڵەت، كە لە لایەن كەسانێكەوە سەرۆكایەتی دەكرێن كە ئایدۆلۆژیای توندڕەو و داعشیان هەیە."

لەكۆتایی ڕاگەیەندراوەكەی بەڕێوەبەرایەتی خۆسەردا هاتووە:" لەبەرئەوەی ئامانجی سەرەكی ئەم هێرشە هێنانەدی گۆڕانی دیمۆگرافییە، داوا لە خەڵكە خۆڕاگرەكانمان لەو دوو گەڕەكە دەكەین دەستبەرداری ماڵوحاڵیان نەبن، هەروەك داوا لەو كەسانە دەكەین كە ناچاربوون ئاوارەبن، بگەڕێنەوە سەر ماڵ و حاڵی خۆیان."