راچڵەكین-
وەزارەتی دارایی و ئابووری حكومەتی هەرێمی كوردستان دەڵێت، ئەمڕۆ دوای تەواوكردنی ڕێكارەكان و وەرگرتنی پارەكە لە لقی هەولێری بانكی ناوەندی عێراق، خشتەی مووچە ڕادەگەیەنرێت و دەست بەدابەشكردنی مووچە دەكرێت.
وەزارەتی دارایی و ئابووری لەڕاگەیەندراوێكدا ئاماژەی بەوەكردووە، ڕۆژی دووشەممە بڕی ( ٢٩٥ ) ملیارو ( ٤٠٥ ) ملیۆن دینار وەك دواین گوژمەی تەمویلی مووچەی مانگی شوباتی فەرمانبەران و مووچەخۆرانی هەرێمی كوردستان خرایە سەر هەژماری بانكی وەزارەتی دارایی و ئابووری لەلقی هەولێری بانكی ناوەندی عێراق.
"بۆ ئەم مانگەش وەزارەتی دارایی حكومەتی فیدراڵ بڕی ( ١٦،١٠٧،٨٨١،٠٠٠ ) شانزە ملیارو سەدو حەوت ملیۆن و هەشت سەدو هەشتاو یەك هەزار دیناری لە تەمویلی مووچەی مانگی شوبات نەناردووە كە بریتییە لە شایستەی مووچەی مانگەكانی ڕابردووی خانەنشینانی شارستانی و سەربازی." وەزارەتی دارایی وا دەڵێت.
وەك لەڕاگەیەندراوەكەی داراییدا هاتووە:" هاوكات بۆ ئەم مانگەش بەداخەوە بڕی ئەو ( ٣٦،٣٦٠،٨٦٤،٠٠٠ ) دینارەشی خەرج نەكردۆتەوە كە مانگی ڕابردوو لە تەمولی مووچەی مانگی كانوونی دووەمی ئەمساڵی بڕیبوو كە شایستەی ساڵی ڕابردووی خانەنشینانی سەربازی و شارستانی و كەمئەندامانی سەنگەر بوو، سەرەڕای ئەوەی لەڕێی نوسراوی فەڕمی و ناردنی تیمی تەكنیكیەوە ڕونكردنەوەی پێویستیشمان پێدابوون و داوای خەرجكردنی ئەو شایستانەمان كردبوو."