وێنە.. ئەرشیف

راچڵەكین -

رووسیا و ئۆكراینا لەچوارچێوەی جێبەجێكردنی رێككەوتنی نێوانیان، سەدان سەربازی یەكتر ئازاد دەكەن كە لە بەرەكانی جەنگدا بەدیل گیرابوون.

ئەمڕۆ شەممە 11-4-2026، وەزارەتی بەرگریی ڕووسیا بڵاویكردەوە، لە چوارچێوەی جێبەجێكردنی ئەو رێككەوتنەی لە دانوستانەكانی ئیستانبوڵ كرا، كە یەكێك لە بڕگەكانی رێككەوتنەكە، ئازادكردنی سەربازە دیلەكانی نێوان رووسیا و ئۆكراینایە، هەردوو وڵات  350 دیلی یەكتریان ئازادكرد.

وەزارەتی بەرگریی ڕووسیا ئاشكریكرد، پرۆسەی ئاڵوگوڕكردنی دیلەكانی جەنگ لە نێوەندگیریی ئیمارات بووە، سەربازە دیلەكانی رووسیا دوای ئازادبوونیان، رەوانەی بێلارووس كراون و دوای ئەنجامدانی پشكنینی پزیشكی و وەرگرتنی چارەسەری پێویست، دەگەڕێندرێنەوە بۆ رووسیا رەوانەی ماڵەوە دەكرێنەوە.

تائێستا رووسیا و ئۆكراینا هەزاران سەربازی یەكتریان ئازادكردووە، كە لە بەرەكانی جەنگدا بەدیل گیرابوون.

ئاڵوگۆڕی سەربازە دیلەكان لەكاتێكدایە سوپای رووسیا لەچەند رۆژی رابردوودا لەئەنجامی هێرشی چڕی سەربازیدا، رووبەرێكی فراوانی خاكی ئۆكراینای كۆنترۆڵكردووە.