راچڵەكین-

وەزارەتی نەوتی عیراق ئاماری مانگی ئاداری بڕی بەرهەمهێنراوی نەوت و داهاتەكەی بڵاوكردەوە.

بەگوێرەی ئامارەكەی وەزارەتی نەوتی عیراق بێت كە ئەمڕۆ دووشەممە 13ی نیسانی 2026 بڵاوكراوەتەوە، لەمانگی ئاداردا 18 ملیۆن و 604 هەزارو 951 بەرمیل نەوت هەناردە كراوە، داهاتی ئەو بڕە فرۆشراوەش 1 ملیارو 957 ملیۆن و 121 هەزار دۆلار بووە.

وەك لەڕاگەبەندراوەكەی وەزارەتی نەوتی عیراقدا هاتووە،لەمانگی ئاداردا  بڕی 1 ملیۆن و 271 هەزارو 200 بەرمیل نەوتی هەرێمی كوردستان لەڕێی بەندەری جەیهانەوە هەناردەكراوە، هاوكات بڕی دوو ملیۆن و 772 هەزارو 217 بەرمیل نەوتی كەركوك لەڕێی بۆری هەرێمی كوردستاندا بۆهەناردەی بەندەری جەیهان كراوە.

مانگی شوباتی ئەمساڵ بڕی هەناردەكراوی نەوتی خاوی عیراق گەیشتە نزیكەی 100 ملیۆن بەرمیل، داهاتەكەشی 6 ملیارو 814 ملیۆن و 585 هەزار دۆلار بووە.

بەراوورد بە مانگی شوبات، هەناردەی نەوتی خاوی عیراق لەمانگی ئاداردا نزیكەی 82 ملیۆن بەرمیل نەوت كەمیكردووە، لەبەرامبەردا داهاتەكەشی نزیكەی پێنج ملیار دۆلار كەمیكردووە.