مژدەی چارەسەری كۆرۆنا رادەگەیەنرێت

تەندروستی

16/06/2020     ژمارەی بینراو 21361

راچڵەكین

شاره‌زایه‌كی كورد لە وڵاتی بەریتانیا، مژدەیەك لەبارەی دۆزینەوەی چارەسەری ڤایرۆسی كۆرۆنا رادەگەیەنێت و ئاشكراشیدەكات، دەرمانەكە لەلایەن دوو پرۆفیسۆری زانكۆی ئۆكسفۆرد-ەوە پشتڕاستكراوەتەوە.

دانا حەمە عەزیز، كە شاره‌زایه‌كی كوردە لە وڵاتی بەریتانیا، رایگەیاند: ئەمڕۆ 16-6-2020، دەرمانی Dexamethasone  وەك چارەسەری بەركەوتوانی ڤایرۆسی كۆرۆنا، لە بەریتانیا ڕاگەیەندرا.

 ئاماژەی بەوەكردووە، دەرمانی Dexamethasone لە كڵاسی  هۆرمۆنی ستیرۆیدە و لە گلاندی adrenal cortex  بەرهەم دەهێنرێت. 

بەوتەی دانا حەمە عەزیز، هەردوو پرۆفێسەر (مارتن لاندرەی) و (پیتەر هۆبی) كە سەركردایەتی تیمی لیكۆڵینەوەی ڤایرۆسی كۆرۆنا دەكەن لە زانكۆی ئۆكسفۆرد، دەرمانی (Dexamethasone) یان وەك چارەسەرێكی گرنگ بۆ بەركەوتوانی ڤایرۆسی كۆرۆنا پشتڕاستكردەوە.

 باسی لەوەشكردووە، زاناكانی بەریتانیا ڕایانگەیاند بڕێكی نزم لە چارەسەری ستێرۆید، ڕێگەیەكی گرنگە بۆ جەنگین دژی ڤایرۆسی كۆرۆنا و، بەڕێژەی ٣٣% ئەو بەركەوتوانە لە مردن ڕزگار دەكات، كە لەڕێگەی دەزگای میكانیكی ventilator وە هەناسە دەدەن، هەروەها بەڕێژەی ٢٠%  ژیانی ئەو كەسانە ڕزگار دەكات، كە لەڕیگەی ئۆكسجینی دەستكردەوە هەناسە دەدەن .

دانا حەمە عەزیز وتیشی:" زاناكان ڕایانگەیاند كە چارەسەكە زۆر  هەرزانە و تەنها پێنچ پاوەندی بەریتانی تێدەچێت و بەئاسانی لە وڵاتە هەژارەكاندا دەستدەكەوێ.

داگرتنی ئەپی راچڵەکین بۆ ئەندۆرید

داگرتنی ئەپی راچڵەکین بۆ ئایفۆن