راچڵەكین
سەرۆكی رەوتی حیكمە هاوپەیمانێتییەكی نوێی سیاسی پێكدەهێنێت و راشیدەگەیەنێت، ئامانجی ئەو هاوپەیمانێتییە بۆ پشتیوانیكردنە لە دەوڵەتێكی بەهێز، كە خاوەن ئیرادەی جەماوەری بێت.
عەمار ئەلحەكیم لەمیانەی راگەیاندنی هاوپەیمانێتییە نوێیەكەی، كە ناوی (عیراقیون)ی لێناوە، رایگەیاند: هاوپەیمانێتییەكە لەسەر هەردوو ئاستی پەرلەمانیی و جەماوەرییە، ئامانجیش لە پێكهێنانی، بۆ پشتیوانیكردنە لە دەوڵەتێكی بەهێز و بە توانا، كە خاوەن سەروەریی و ئیرادەی جەماوەری بێت.
سەرۆكی رەوتی حیكمە داواشیكرد بەزووترین كات هەڵبژاردنی پێشوەختە لە عێراق ئەنجام بدرێت، كە دوور بێت لە ساختەكاری و بەشێوەیەكی شەفاف و بێگەردانە بەڕێوەبچێت.
بەگوێرەی زانیارییەكان، عەمار ئەلحەكیم دەیەوێت لەرێگەی پێكهێنانی ئەو هاوپەیمانێتییە نوێیە، كە لە 31 پەرلەمانتار پێكدێت، پشتیوانی لە حكومەتەكەی مستەفا كازمی بكات و لەناو ئەنجومەنی نوێنەرانیش ببێتە هێزێكی گەورەو كاریگەر لە بەرامبەر كوتلەكانی دیكەی شیعە، وەك سائیرون بە سەرۆكایەتی موقتەدا سەدرو فەتح بەسەرۆكایەتی هادی عامری.