راچڵەكین
ئەنجومەنی نوێنەرانی كار بۆ هەڵوەشاندنەوەی بڕیاری نوێكردنەوەی مۆڵەتی كۆمپانیاكانی پەیوەندیكردن دەدات كە لەلایەن مستەفا كازمییەوە دراوە، پەرلەمانتارێكیش ئاشكرایدەكات، زیاتر لە 100 واژۆی پەرلەمانتاران بۆ ئەو مەبەستە كۆكراوەتەوە.
عەلا روبەیعی ئەندامی هاوپەیمانی سائیرون لەئەنجومەنی نوێنەرانی عێراق رایگەیاند: زیاتر لە 100 واژۆی پەرلەمانتاران كۆكراوەتەوە بۆ رەتكردنەوەی بڕیارەكەی حكومەتی تایبەت بە نوێكردنەوەی مۆڵەتی كاركردنی كۆمپانیاكانی پەیوەندیكردن.
وتیشی:" جێگری یەكەمی سەرۆكی پەرلەمان، پەیوەندی بە حكومەتەوە كردووەو داوای لێكردوون كاركردن بە بڕیارەكە رابگرن".
ئەو پەرلەمانتارە هۆكاری رەتكردنەوەی بڕیارەكەی حكومەتی بۆ خراپیی خزمەتگوزارییەكانی ئەو كۆمپانیایانە گەڕاندەوە لەبواری پەیوەندیكردن، سەرباری كێشەكانی پەیوەست بە قەرزەكانیان و گرانیی نرخی پیوەندیكردن و ئەنتەرنێت.
لەچەند رۆژی رابردوودا، حكومەتی عێراق بە سەرۆكایەتی مستەفا كازمی، بڕیاریدا مۆڵەتی كاركردنی هەرسێ كۆمپانیای ئاسیاسێڵ و كۆڕەك تیلیكۆم و زەین نوێبكاتەوە، بڕیارەكەش كاردانەوەی توندی بەشێك لە پەرلەمانتارانی لێكەوتەوەو بە بڕیارێكی هەڵەیان وەسفكرد.