سودان؛ بەهۆی شەڕوپێكادانەوە زیاتر لە 865 مەدەنی كوژراون

جیهان

25/05/2023     ژمارەی بینراو 95

راچڵەكین-

سەندیكای پزیشكانی سودان رایگەیاند، لە ئاكامی ئەو شەڕ و پێكدادانانەی كە لە 15ی نیسانەوە لەنێوان سوپای سوودان و ھێزەكانی پشتیوانی خێرا سەریھەڵداوە تا ئێستا، 865 مەدەنی كوژراون.

سەندیكای پزیشكانی سودان لە راگەیەندراوێكدا ئاماژەی بەوەداوە كە بەھۆی بەردەوامی شەڕ و پێكدادانەكانی نێوان سوپای سودان و ھێزەكانی پشتیوانی خێراوە، ژمارەی قوربانییان زیادی كردووە.

ئەوەش روونكراوەتەوە، رۆژانی 21، 22 و 23ی ئەم مانگەدا، شەڕ و پێكدادان لەنێوان سوپای سودان و ھێزەكانی پشتیوانی خێرا لە خەرتومی پایتەخت روویداوە و لە ئاكامدا، دوو مەدەنی كوژراون و 103ی دیكەیش برینداربوون، بەوەیش تا ئێستا 865 مەدەنی كوژراون و سێ ھەزار و 634ی دیكەیش برینداربوون.

باسی لەوەیش كردووە كە ژمارەی قوربانییانی شەڕ و پێكدادانەكان لەوەی كە راگەیەندراوە زیاترە، لەبەرئەوەی ژمارەیەكی زۆر بریندار و كوژراو ھەن كە لە نەخۆشخانەكاندا تۆمار نەكراون.

دوێنێ چوارشەممە، وەزارەتی تەندروستیی سوودان رایگەیاندبوو كە لە ئاكامی ئەو شەڕ و پێكدادانانەی كە لە 10ی نیسانەوە لەنێوان سوپای سوودان و ھێزەكانی پشتیوانی خێرا سەریھەڵداوە تا ئێستا، 709 كەس كوژراون و پێنج ھەزار و 424ی دیكەیش برینداربوون.

رۆژی 22ی ئەم مانگە، ئاگربەستی نێوان سوپای سوودان و ھێزەكانی پشتیوانی خێرا كە لە سعوودیە واژوو كرا، چووە بواری جێبەجێ كردنەوە.

داگرتنی ئەپی راچڵەکین بۆ ئەندرۆید

داگرتنی ئەپی راچڵەکین بۆ ئایفۆن