باڵانبۆ محەمەد
13/11/2020
لە ساڵی ٢٠١٤ وە حكومەتی هەرێمی كوردستان مۆدێلێكی تازەی داهێنا لە دابەشكردنی مووچەدا بەچەند شێوەیەك، پاشەكەوتكردنی مووچە درێژكردنەوەی مانگ لە ٢٩ -٣٠ -٣١ كەوە بۆ ٤٥ -٥٠ -٦٠ ڕۆژ لێبڕینی مووچە بە %٢١ و %١٨.
ئەمە وێڕای ناشەفافییەت لە داهاتی ناوخۆو داهاتی خاڵە سنورییەكان و داهاتی نەوت.
زۆرمان هاواركرد ئەم میلـلەتە زۆر هاواریكرد زۆر دانیان بە خۆیاندا گرت
گوتاری سەری بەرزمان بۆ مووچە نەوی ناكەین ئێستاش لە گوێی هەموو جیلی ئاڵتونیدا دەنگ دەداتەوە، ئەم میلـلەتە هاوكاربوون بۆ ئەوەی ئەم حیزبانە لە نەبوونییەوە ببن بە خاوەنی گەورەترین سەرمایە، میلـلەت لەنەزانیان نەبوو، بەڵكو لە هەستكردن بە ئەركی نەتەوایەتی و دڵسۆزییان بۆ حیزبە كوردییەكان لەپێناو بیری نەتەوایەتی و دروستكردنی دەسەڵاتێكی كوردی دادپەروەر، بەڵام بەداخەوە پێچەوانەكەی دەرچوو.
حیزبە كوردییەكان بەڕاستی زیرەك بون و زیرەكن توانیان ئەم میلـلەتە لەپێناو بەرژەوەندییەكانی خۆیان بەكاربهێنن.
دەسەڵاتدارانی كورد هەمیشە ناوچە كوردستانییەكانی دەرەوەی هەرێمی كوردستان و نەیارەكانی كوردستانیان كردووە بە وشەی سەر زمان و ترساندنی میلـلەتی كورد لەپێناو مانەوەی خۆیاندا لە دەسەڵات.
ئەگەر ناوچە كوردستانییەكانی دەروەی هەرێمی كوردوستانیش دەكەن بەبیانوو بۆ مانەوەی خۆتان لە دەسەڵات، ئەو ناوچانە دەبێت بەپێی دەستوری عێراقی فیدراڵ چارەسەر بكرێن نەك بەپێی ڕێككەوتنی سیاسیی ئێوە.
ئێمەی كورد میلـلەتێكی سۆزدارین، بە گریان و پێكەنین باوەڕ دەكەین، ئایا ئەوەی ئەمڕۆ لە ئەنجومەنی نوێنەران لە بەغداد ڕوویدا غەدری عەرەبی شیعەو سوننەیە بەرانبەر مووچەخۆران و دانیشتوانی هەرێمی كوردستان، یان غەدری دەسەڵاتی كوردە بەرانبەر بە دانیشتوانی هەرێمی كوردستان.
دەسەڵاتدارانی هەرێمی كوردستان فەرموون ئەگەر حكومەتی فیدراڵ غەدرتان لێدەكات، پەنابەرنە بەر دادگای فیدراڵی، ئەگەر ئێوەش دەتانەوێت سۆزی ئەم میلـلەتە بەكاربهێنن بۆ زیاتر دەوڵەمەندكردنی خۆتان، پێویستە لێرەدا ڕابووەستن.
ئەوەی ئەمڕۆ لە ئەنجومەنی نوێنەران ڕوویدا، غەدر كردن نییە لە مووچەخۆران و لە دانیشتوانی هەرێمی كوردستان، ئەوەی مووچەخۆران و دانیشتوانی هەرێمی كوردستان نەیانویست بیكەن لەپێناو بیری نەتەوایەتی، عەرەبی شیعەو سوننە بۆیان كردن.
ئایا دەسەڵاتی كوردی گوێڕایەڵی میلـلەتەكەی خۆی بوایە باشتربوو، یان تەسلیم بوون بە فشاری عەرەبی شیعەو سوننە.
كۆتایی بە گەندەڵی و ناشەفافییەت هات، ئەگەر عێراقیت پێویستە لەگەڵ حكومەتی عێراقی فیدراڵدا بیت، ئەگەر خاوەنی ئابووری سەربەخۆیت، بفەرموون لەسەرۆك كۆمار تا دواپلە لە بەغداد بكشێنەوە.
ئەگەر كوردستان و داهاتی سامانە سروشتییەكان، نەوت و غازتان تەسلیمی توركیا كردووە، فەرموون با توركیا چارەسەری برسیكردنی ئەم میلـلەتەتان بۆ بكات، ئەگەر هیچ كام لەمانەشتان پێ ناكرێت، ئەوا پێویستە ئەم میلـلەتە لەم خەوە بەئاگا بێت و بزانێت قبوڵكردنی ئەم دەسەڵاتە قبوڵكردنی برسێتی و بێ مووچەییە بۆ ماوەی پەنجا ٥٠ ساڵ.
چارەسەر لەگەڵ شەڕ نیم.
ناڕەزایەتی دەربڕینی سەر تاسەری دوور لەبیری تەسكی حزبایەتی.
پاڵپشتی و هاوكاری كوردانی دەرەوەی وڵات كە هەمیشە ڕۆڵی كاریگەریان هەبووە لە چارەسەركردنی كێشە سیاسی و نەتەوایەتییەكان.
تۆڵەسەندنەوە لەسەر سندوقەكانی دەنگدان
ئەگەر ئەمانەش نەبوون بە چارەسەر
كورد دەڵێت جام كەپڕبوو لێی دەڕژێت.