یەكێك لە فاكتەرە گرنگەكانی پێشكەوتنی هەر كۆمەڵگەیەك، باوەڕبەخۆبوونە (Self Confidence)، چ لەسەر ئاستی تاك بێت یان لەسەر ئاستی كۆمەڵگە بە گشتی.
لە (رابردوو و ئێستا و داهاتوو)شدا یەكێك لە ڕێگەكانی دوژمنانی كورد بۆ ڕێگەگرتن لە دروستبوونی كیانێكی كوردی، تێكشاندنی كەسایەتی و سایكۆلۆژیای (تاكی كورد) بووە، ئەویش لە رێگەی سیاسەتی (سەركوتكردن و ژێردەستەیی و داپڵۆسین و چەوساندنەوە) ئەم پڕۆسەیەش بە درێژایی مێژوو (لە رێگەی جیاوازەوە) بە شێوەیەكی بەردەوام و سیستەماتیك لە لایەن دووژمنان و داگیركەرانی كوردستانەوە پیادەكراوە، ئامانج لەم پڕۆسەیەش دروست نەبوونی تاكی كوردی (باوەڕ بەخۆبووە) كە بەردی بناغەی درستبوونی وڵاتێكی سەربەخۆ و پێشكەوتووە، بەڵام خۆشبەختانە مێژوو سەلماندوویەتی كەوا فاكتەری (باوەڕبەخۆبوون) نهێنی مانەوە و سەركەوتنی میللەتی كورد بووە لە (ڕابردوو و ئێستا و داهاتوو)شدا.
لەم چوارچێوەیەدا پێویستە ئێمەی كورد لەو حەقیقەتە تێ بگەین كەوا (باوەڕبەخۆبوون) بەردی بناغەی سەرهەڵدانی هەموو شارستانیەتەكانی جیهان بووە، بۆ نموونە ئەو ئەمریكایەی كە ئێستا بووەتە زلهێزترین وڵاتی دونیا لەسەر دەستی كۆمەڵێك كەسی (باوەڕبەخۆبوو) بنیاتنراوە كە بە (باوكانی دامەزرێنەر) ناسراون، بریتین لە:
جۆرج واشنتن، جۆن ئەدامز، تۆماس جیفەرسۆن، جەیمس مادیسۆن، ئەلێكساندەر هامیڵتۆن، جەیمس مۆنرۆو، بێنجامین فرانكلین، ئەمانە بەیەكەوە، بناغەی دەوڵەتێكی دیموكراسی ویلایەتە یەكگرتووەكانیان دامەزراند، شەرعیەتیێكیان جێهێشت كە نەخشەی جیهان دادەڕێژێت.
لێرەدا پێویستە هەڵوەستەیەك بكەین و هەندێك گلەیی لە خۆشمان بكەین و دان بە هەندێك ڕاستی تاڵدا بنێن، كە زۆربەی لایەنە سیاسییەكانی چوار پارچەی كوردستان بە ئاگایی بێت، یاخود بەبێ ئاگایی، درێژەپێدەری هەندێك لە شێوازەكانی داگیركەران بوون لە مامەڵەكردن لەگەڵ یەكتردا، لە یادەوەری هەمووشماندا كۆمەڵێك یادگاری تاڵ هەیە لە سەر تێكشاندنی كەسایەتی یەكتر، بە جۆرێك كە دەرەنجامێكی خراپی لێ كەوتەوە و كۆمەڵێك تاكی بێمتمانە و (باوەڕبەخۆ نەبوو)ی لێبەرهەم هاتووە.
لە كۆتاییدا گرنگە تاك بە تاكی نەتەوەی كورد باوەڕی تەواوی بە خۆی هەبێت و بە هیچ جۆرێك خۆی پێ كەمتر نەبێت لە نەتەوەكانی تری ناوچەكە و جیهان، بۆ ئەم مەبەستە لەلایەك گرنگە لەسەر ئاستی (حكومی) لە ڕێگای سێكتەری پەروەردەوە هەوڵ بدرێت وانەی (باوەڕبەخۆ بوون) بخرێتە نێو مەنهەجی خوێندن، تاكو بەشێوازێكی (زانستیانە و سەردەمیانە) پڕۆسەی پەروەردەكردن لە پێناو دروستكردنی (تاكێكی باوەڕ بەخۆبوو) بەڕێوە بچێت، هەروەها لەلایەكی تریش گرنگە لەسەر ئاستی كەسی، هەموومان كار لەسەر خۆمان و خێزان و ژینگە و دەوروبەرمان بكەین، بە جۆرێك كە هەمیشە (تۆو)ی باوەڕبەخۆبوون (دوور لە خۆ بەزلزانین و نەژاد پەرستی) لە ناخماندا بچێنین، لەپێناو بەدیهێنانی خەونەكانمان و رووبەڕووبوونەوەی پیلانی دوژمنان، چونكە بەدیهێنانی خەونەكان و ڕووبەڕووبوونەوەی پیلانی دووژمنان پێویستی بە كۆمەڵگەیەك هەیە كە تاكەكانی باوەڕیان بە خۆیان هەبێت.