یەكێتیبوون لە تێڕوانینی منەوە

قوباد تاڵەبانی


پێش 2 هەفتە


ساڵانە لە یادی دامەزراندنی یەكێتی هەموومان میدیا پڕ دەكەین لە درووشم و بیرەوەری مێژوویی. ئەمساڵ من بیرم لەوەكردەوە بەشێوازێكیتر لەو یادە بدوێم و هەوڵبدەم لەدیدی خۆمەوە پێناسەیەك بۆ یەكێتی بوون بكەم. 
 
لای من یەكێتی بوون زۆر بەسادەیی بوێرییە بەرامبەر تەحەددا جۆراوجۆرەكان. حیزبێك بۆ بەرهەڵستیكردنی دڕندەترین رژێم دروست بووبێت، دواتریش بەشێك بووبێت لە هۆكارەكانی رووخاندنی ئەو رژێمە، هەر ئەوەمان فێر دەكات كە یەكێتی بوون مانای بوێری و بەرەنگاربوونەوەی تەحەدداكانە‌‌‌.
 
ئەگەر یەكێتی بیت، ئە‌وا یە‌كێتی حیزبی بەرپرسیاریە‌تییە‌، بۆیە‌ دەبێت قۆڵی لێ هەڵماڵیت و شانی بدەیتە بەر و بە كردار رووبەڕووی ئاڵۆزیی و تەحەدداكان ببیتەوە. كورد وتە‌نی: بە‌ ریش نییە‌ بە‌ ئیشە‌!.
 
یەكێتی بوون خزمەتكردنی كۆمەڵانی خەڵكی كوردستانە بێ جیاوازی. ئەم حیزبە تەنها بۆ خۆی دانەمەزرا، بۆ ئەوە نەهاتە مەیدان سەركردە و ئەندامەكانی دەوڵەمەند بكات، موڵكی تەنها شارێك یان عشیرەتێك یان بنەماڵەیەك نەبوو و نابێت، بەڵكو خزمەتكاری هەموو چین و توێژەكانی خەڵكی كوردستانە. ئەم حیزبە‌ لەپێناو ئازادی، دیموكراسی، مافی مرۆڤ و مافی چارەنووس وعە‌دالە‌تی كۆمە‌ڵایە‌تی دروست بوو.
 
بۆیە ئێستا پێویستمان بە هەڵسەنگاندنە؛ كام لەو ئامانجە سەرەكییانە هاتوونەتەدی تا ئێمە بچینە سەر ئامانجیتر و كاری بۆ بكەین؟ ئەگەر رێژەیەك دیاری بكەین بۆ هەریەك لەو ئامانجانە، ھەر یەكەیان چەندیان دەدەینێ؟ تا چەند رازین لەو ئازادیەی لە كوردستان هەیە؟ تا چەند پێمانوایە كوردستان بەرەو دیموكراسی رۆیشتووە؟ چەندمان ماوە تاوەكو بڵێین ئێمە حیزبێكی دیموكراسین لەناو هەرێمێكی دیموكراسی و وڵاتێكی دیموكراسیداین؟ پێوەرەكان چین كە بەراوردیان دەكەین بۆ هەڵسەنگاندنی ئاستی دیموكراسی ، چ لە ناو حیزب و چ لە ناو حكومەت؟ تا چەند پارێزەری مافی مرۆڤ بووین؟
 
پێموانییە تەنها لەبەر ئەوەی كۆنگرەمان گرێدا و هەڵبژاردن دەكەین بووبین بە دیموكراتی، یان باوەڕمان بە دیموكراسی هەبێت، چونكە زۆرجار هێزە نادیموكراتییەكانیش هەڵبژاردن دەكەن و كۆنگرەش دەبەستن. 
 
كەواتە یەكێتی بوون، بۆ من باوەڕهێنان و كاركردنیشە بەو ئامانج و پرەنسیپانەی كە لە پێناویدا دروست بووە، نەك تەنها قسە كردن، یان بۆڵەبۆلكردن و تانەلێدان. یەكێتی بوون كاركردنە لە پێناوی ئەو بەهاو باوەڕانە و گونجاندنی ژیانی خۆمانە لەو چوارچێوەیەدا. ناكرێت بڵێیت دیموكراسی و ئازادیم دەوێت بۆ وڵات، بەس لە ناو ماڵی خۆت، یان لە ناو حیزب، یان لە شوێنی كار و دەوامەكەت ستەمكار و دیكتاتۆر بیت.
 
یەكێتی بوون، بۆ من هونەری بەڕێوەبردنیشە. راستە یەكێتی لە پێناو ئازادی بۆ عێراق و و دیموكراسی بۆ كوردستان دروست بووە. بەڵام لە ساڵی 1992 بەدواوە لە لووتكەی دەسەڵاتی جێبەجێكردندا بووە تا ئێستا. كۆمەڵانی خەڵك چاوەڕێ لە یەكێتی دەكەن ژیان و گوزەرانیان بۆ چاك بكەین، نەك وەك ئەوان گلەیی و رەخنە بگرین. ئۆرگانەكانی حیزب، كادرەكانی حیزب، نێردەكانی حیزب بۆ ناو حكومەت، بەربژێرەكانی حیزب بۆ پەرلەمان، دەبێت بە شێوەیەكی كرداری، رۆژانە ، بە رۆحیەتی دەوڵەتداری و بەرپرسیارێتی كار بكەن ، نەك تەنها درووشمبازی. 
 
دەبێت بەشی خۆمان ئەركی راستكردنەوەی باری لاری سیاسەتكردن و حوكمڕانی لە كوردستان و عێراق لەسەرشان ھەڵبگرین، ئەمەش بە درێژكردنی پەنجەی تۆمەت بۆ یەكتری و شكاندنی یەكتری لە رێگەی میدیا و سۆشیاڵ میدیا یان دژایەتی ناو ئۆرگانەكانی حیزب نایەتە دی، بەڵكو بەوە دێتەدی یەكێتی هەست بەو بەرپرسیاریە‌تییە‌ بكات كە حەز بكەین یان نا تازە لەسەر شانمانە و بەشێكی كاریگەربین لەبەڕێوەبردنی هەرێمی كوردستان. ئەم ئامانجەش بەوە دێتەدی كاریگەرییمان هەبێت لەسەر ئاڕاستەكردنی كۆمەڵگامان بەرەو كۆمەڵگایەكی ئارام و ئاشتیخواز و خاوەن راوبۆچوونی خۆی كە تەندروست و كاریگەر بێت. 
 
یەكێتی هەرگیز لەو باوەڕەدا نەبووە كە دەبێت، یان دەتوانێت بە تاقی تە‌نھا ئەم هەموو بەرپرسیاریە‌تییە‌ بگرێتە ئەستۆی خۆی. بۆ سەركەوتن لە جێبەجێكردنی ئەرك و بەرپرسیاریەتییەكانی و پێشكەشكردنی خزمەتی زیاتر یەكێتی لە رابردوو لە ئێستا و ئایندەش پێویستی بە هەماهەنگی و هەندێكجار هاوپەیمانێتی هەبووە و دەبێت، چ هی نێوخۆیی و چ هی نێودەوڵەتیش. ئەمەش  ئەوەمان لێ دەخوازێت ژیرانە و وەك مام گوتەنی؛ ئاگایەكمان لە پانایی بێت، پشت بەستوو بە هەڵسەنگاندنێكی بابەتیانە‌ لەبارەی هێزی خۆت و یار و نەیارەكان بڕیاری دروست بدەین.
 
هەرگیز نابێت رێگە بدەین ژاوەژاوی سۆشیال میدیا زاڵ ببێت بەسەر ئارامی لە بیركردنەوەمان و لە لۆژیكی بڕیارەكانمان. تەلارێك بە چەندین مانگ، هەندێكجار چەندین ساڵ دروست دەكرێت، بەڵام بە رۆژێك دەڕوخێنرێت. یەكێتی 46 ساڵە پەیوەندی سیاسی خۆی و پەیوەندییە دیپلۆماسیەكانی خۆی بە هێز دەكات، ئێستا چۆن دەتوانین كاربكەین بۆ زیاتر بەهێزكردنیان؟ راگەیاندنی هاوپەیمانێتی لەگەڵ بزووتنەوەی گۆڕان و لێكتێگەشتنمان لەگەڵ ھە‌ندێك لە‌ لایەنە سیاسییەكانی تر هەنگاوێكی زۆر گرنگ و پێویست بوو لەم میانەدا پێویستمان بەزیادكردنی ئەم جۆرە هەنگاوانە هەیە. لەمەش گرنگتر بۆ گەیشتنمان بە كەناری ئارامی، دەبێت زیاتر كاربكەین بۆ ئاساییكردنەوەی دۆخی سیاسی و میدیایی لە كوردستان. 
 
ئاستی پەیوەندییە دیپلۆماسیەكانی یەكێتیش رۆژ لە دوای رۆژ بەهێزتر دەبن، بە‌ڵام پێویست دەكات گرنگییەكی زیاتر بدەین بە پەیوەندییەكانمان لەگەڵ حیزب و لایەنە سیاسییەكان و كەسایەتییە سیاسی و ئایینییەكانی بەشەكانی تری عێراقیش. لە ساڵانی رابردوو وەبەرهێنانێكی زۆر كرابوو لەو پەیوەندییانە كە ئەگەر بە بەردەوامی پەرەیان پێ نەدرێن، ئەوا كاڵ و سارد دەبنەوە و هەوڵەكان بەفیڕۆ دەچن. 
 
سەرەنجام هەڤاڵان، با هەمیشە ئەوە بەبیر خۆمان بهێنینەوە كە یەكێتی بوون ئیمتیاز نییە، ئەرك و بەرپرسیاریە‌تییە‌. ئەرك و بەرپرسیارێتیش پێویستی بە هەنگاوی كردەییە، نەك تەنها تیۆر و پەیامی میدیایی.
 
بەداخەوە حەزم دەكرد ئەم یادە لە كوردستان بكەمەوە، بەڵام كاتێك ئەمە دەنووسم بە ئەركی خۆم هەستاووم و لە بەغدادم بۆ بەردەوام بوونی گفتوگۆكانمان و مسۆگەركردنی مافە رەواكانی كۆمەڵانی خەڵكی كوردستان. 
 
دروود بۆ گیانی پاكی مام و شە‌ھیدانی گە‌لە‌كە‌مان.
 
پیرۆز بێت یادی دامەزراندی یەكێتیمان. 
 
هەر شاد و سەربەرز و سەركەوتوو بن.