*فرمێسكی رۆژنامەكانی میسر بۆ مەرگی ئوم كەلسوم......

مەریوان مەسعود


09/10/2021

 

لەم رۆژانە، لەیەكێك لە كەناڵە ئاسمانییە میسرییەكان، بەشێك لە دیدارێكی تەلەفزیۆنی بڵاوكردەوە كە لەساڵی 1967 تەلەفزیۆنی كوێت لەگەڵ شێخ و قورئانخوێنی ناسراو (عەبدولباست عەبدولسەمەد) سازی كردبوو ، لەدیدارەكەدا ئەم قورئانخوێنە زۆر بەراشكاوانە وەڵامی بێژەرە كچەكە دەداتەوە، كاتێك لێی دەپرسێ‌:
*یاشێخ گوێ‌ لەگۆرانی دەگری؟
-بەڵێ‌ زۆر گوێ‌ دەگرم
*گوێ‌ زیاتر لە كام گۆرانیبێژە دەگری؟

-من گوێ‌ لە هەموو دەنگێكی جوان و خۆش دەگرم، بەڵام دەنگی ناوازەو جوانتر لای من دەنگی خاتوو(ئوم كەلسوم)ە، كە بەلای منەوە كەوكەبی شەرق و غەربە!.
بێگومان، كاتی خۆی ئەم دیدارەو ئەم بۆچوونەی شێخێكی گەورەی وەكو عەبدولباست، دەنگدانەوەی زۆری هەبوو، بەتایبەت كە ئیخوانەكان دژی وەستانەوەو هەڵمەتێكیان بۆ ناشیرینكردنی دەستپێكرد، بەڵام كاتێك گۆرانیبێژی گەورە ئوم كەلسوم بەیەكجاریی لەشوباتی 1975 بەهۆی نەخۆشییەوە ماڵئاوایی كرد، كەزیاتر لە 100 سەعات رووبەڕووی مەرگبۆوە بە قورسیی، بەڵام دواجار كۆچی دوایی كرد. زیاتر لە یەك ملیۆن هاووڵاتی بە گریانەوە لە مەراسیمی ناشتنەكەی ئامادەبوون، كە زیاتر لە 3 سەعات بەناو شەقامەكانی قاهیرە دەیانگێڕاو گوڵبارانیان دەكرد.

لەمێژووی دوورو نزیك، باوەڕ ناكەم هیچ كەسایەتییەكی هونەریی هێندەی ئوم كەلسوم خەڵك بۆی بە سوێ‌ بوو بێ‌ و خۆڕسكانە رژابنە سەر شەقامەكان، بۆیە لەو كاتەوە ئیخوانەكان بۆچوونیان لەسەر ئوم كەلسوم و هەڵوێستەكانی گۆڕاو وەكو دەڵێن بێدەنگیان لێكرد و شێخ عەبدولباست-یش هەتا مردیش لە بۆچوونەكەی خۆی پەشیمان نەبۆوەو هەمیشە گوێی لە دەنگە نازدارەكەی ئوم كەلسوم دەگرت.

دوای كۆچی دوایی ئەم ئەستێرەیەی دونیای هونەر و گۆرانیی، هەموو رۆژنامەكانی میسر مانشێتەكەیان بوو بە (ئوم كەلوسم مرد) (ماڵئاوا ئوم كەلسوم)، تەنانەت میدیا عەرەبی و جیهانییەكانیش دوو رۆژ بایەخیان بە مردنەكەیدا،بەتایبەت رۆژنامەیەكی گەورەی وەكو ئەلئەهرام-ی میسری، نووسیبووی(ملیون مواطن فی وداع أم كلثوم).
ئوم كەلسوم، زۆری لەسەر وتراوە، چ وەكو ژیانی تایبەتی چ وەكو هونەرمەند و تەنانەت مردنەكەشی قسەی زۆر لەبارەوە دەكرێت، چونكە بۆ ژیانی تایبەتی نازانرێت ئایا ئوم كەلسوم شووی كردووە یان نا، قسە زۆر هەبوو كە یەكجار شووی كردووە، بەڵام ئەویش نەسەلمێنرابوو، بۆ گۆرانییەكانیشی هەمیشە میسرییەكان كێشەی بلیتی كۆنسێرتەكانیان هەبوو، چونكە بەر نەدەكەوت و زۆرجاریش تەنیا دەوڵەمەندو ژیانخۆشەكان دەیانتوانی بلیتی ئاهەنگەكانی بكڕن، بەمەش هەوادارە هەژارەكانی تەنیا میلی رادیۆكانیان هەبوو كە گوێی لێبگرن، بۆ مردنەكەشی هەر وابوو، چونكە هەوادارەكانی دەیانوت: مردنەكەی زۆر كتوپڕبووەو ئەگەر راستە 100 رۆژە لەگەڵ مەرگ دەجەنگێ‌ بۆچی حكومەتی ئەو كاتەی میسر خەڵكی ئاگادار نەكردۆتەوە، هەرچەندە رۆژنامەی ئەلئەهرامی زمانحاڵی حكومەت، ئەوە رەتدەكاتەوە، چونكە پێی وایە ئەو چەندین راپۆرت و هەواڵی لەسەر ساتەكانی كۆتایی ئوم كەلسوم كردووە، بەڵام خەڵكەكە ئەوەیان رەتدەكردەوە، بۆیە چەند وێنەیەكیش هەیە كە هەوادارەكانی لە كاتی مەراسیمی ناشتنی تەرمەكەی، رۆژنامەی ئەلئەهرام دەدڕێنن، وەكو ئاماژەیەك بۆ (درۆزنی) رۆژنامەكە!.

بەڵام ئەوەی راستییەو ناگۆڕێت وەكو شێخ عەبدولباست لە دیدارە تەلەفزیۆنییەكەی وتی: كەوکەبی شەرق و غەرب، كۆچی دوایی كردو چەندین شاكاری هونەریی لەدوای خۆی جێهێشت، كە ئێستاش لە زۆربەی چایخانەو قاوەخانەكانی میسر، دەنگی ئەم خانمە هونەرمەندە دێت و تێكەڵ بە رۆحی میسرییەكان دەبێت.