راچڵەكین

كۆمسیۆنی باڵای سەربەخۆی هەڵبژاردنەكانی عێراق، ئامادەیی خۆی بۆ ئەنجامدانی هەڵبژاردنی پێشوەخت لەو وادەیە دەردەبڕێت كە مستەفا كازمی دیاریكردووە، لە راگەیاندراوێكیشدا مەرجەكانی بەرشێوەچوونی پرۆسەكە دەخاتەڕوو.

بەگوێرەی ئەو راگەیاندراوەی كە ئەمڕۆ 1-8-2020ن بڵاویكردووەتەوە، كۆمسیۆنی هەڵبژاردن رایدەگەیەنێت، ئامادەین پرۆسەی هەڵبژاردنی پێشوەخت لە رۆژی 6-6-2021 ئەنجام بدەین كە وادەكەی لەلایەن سەرۆك وەزیرانەوە دیاریكراوە.

كۆمسیۆنی هەڵبژاردنەكانی عێراق ئاماژەی بەوەشكردووە، بەڕێوەچوونی پرۆسەكە پەیوەستە بەچەند مەرجێكەوە، لەوانە:

1- ئەنجومەنی نوێنەران بەزووترین كات یاسای هەڵبژاردنەكان پەسەند بكات و لە رۆژنامەی فەرمی بڵاوبكرێتەوە، بەوپێیەی یاساكە دەبێتە چوارچێوەی پرۆسەی هەڵبژاردن.

2- ئەنجومەنی نوێنەران بە یاسا جێگرەوەی ماددەی 3 لە فەرمانی ژمارە 30 ی ساڵی 2005 دیاری بكات، بۆ تەواوكردنی نیسابی دادگای باڵای فیدراڵی، كە تاكە لایەنی راسپێردراوە لەڕووی یاساییەوە بۆ پەسەندكردنی ئەنجامی هەڵبژاردنەكان.

3- حكومەت بودجەی تایبەت بە هەڵبژاردن ئامادە بكات و ئەو پێداویستییانەی هەڵبژاردن دابین بكات كە لەلایەن كۆمسیۆنەوە داواكراوە، بۆئەوەی بتوانرێت هەڵبژاردنەكە لەوادەی دیاریكراودا ئەنجام بدرێت.

4- كۆمسیۆن داوا لە نەتەوە یەكگرتووەكان و رێكخراوە نێودەوڵەتییەكانی تر دەكات بۆ پێدانی یارمەتی تایبەت بە ئەنجامدانی هەڵبژاردن و چاودێریكردنی پرۆسەكە.