بەگوێرەی رێككەوتنەكە، شنگال ئاوەدان دەكرێتەوەو دانیشتوانەكەشی دەگەڕێنەوە زێدی خۆیان
راچڵەكین –
هەردوو حكومەتی عێراق و هەرێمی كوردستان لەبارەی ناوچەی شنگال گەیشتنە رێككەوتن، وتەبێژی حكومەتی عێراقیش ناوەڕۆكی رێككەوتنەكە ئاشكرا دەكات و رایدەگەیەنێت، مستەفا كازمی توانی ئەو كارە بكات كە ئەوانی دیكە نەیاتنوانی ئەنجامی بدەن.
ئەحمەد مەلا تەڵاڵ وتەبێژی حكومەتی عێراق، لە لێدوانێكی رۆژنامەوانیدا رایگەیاند، ئەمڕۆ 9-10-2020، بە چاودێری مستەفا كازمی، رێككەوتنێكی مێژوویی لەنێوان هەرێم و بەغدا ئەنجامدرا بۆ ئاساییكردنەوەی دۆخی ناوچەی شنگال و گەڕاندنەوەی دانیشتوانەكانی و دەستكردن بە پرۆسەی ئاوەدانكردنەوە.
وتەبێژی حكومەتی عێراق ئاشكرایكرد، رێككەوتنەكە دەسەڵاتی حكومەتی فیدراڵی بەسەر ناوچەی شنگال پتەودەكات و كۆتایی بە دەسەڵاتی گروپە چەكدارەكانی دەهێنێت.
ئاماژەی بەوەشكرد، رێككەوتنە مێژووییەكە دەرفەت لەبەردەم گەڕانەوە دانیشتوانی شنگال و ئاوەدانكردنەوەی ناوچەكە بەهەماهەنگی لەگەڵ حكومەتی هەرێم دەڕەخسێنێت و متمانەی هاوبەشیش لەنێوان هەرێم و بەغدا دەگەڕێنێتەوە.
ئەمڕۆ هەینی شاندێكی حكومەتی هەرێمی كوردستان بە سەرۆكایەتی رێبەر ئەحمەد وەزیری ناوخۆی هەرێم، سەردانی بەغدای كرد بەمەبەستی رێككەوتن لەبارەی ئاساییكردنەوەی ناوچەی شنگال.