ماكرۆن هێرشەكەی تیرۆریستییەكەی خستە ئەستۆی ئیسلامییە توندڕەوەكان
راچڵەكین –
لە كاردانەوەی هێرشە تیرۆریستییەكەی ئەمڕۆی شاری نیس-ی باشووری فەرەنسا كە كوژرانی سێ هاووڵاتی و برینداربوونی چەند كەسێكی دیكەی لێكەوتەوە، سەرۆك كۆماری ئەو وڵاتە باری نائاسایی راگەیاندو ئۆباڵی هێرشەكەشی خستە ئەستۆی ئیسلامییە توندڕەوەكان، داواشی لە هاووڵاتیانی وڵاتەكەی كرد، چاوكراوە بن و رێگە نەدەن توندڕەوەكان دووبەركی دروستبكەن.
ئیمانوێل ماكرۆن سەرۆك كۆماری فەرەنسا، لە لێدوانێكدا رایگەیاند، هێرشە تیرۆریستییەكەی شاری نیس و هێرشەكانی دیكەش كە دەكرێنە سەر فەرەنسا، بەهۆی بەرگریكردنمانە لە لە بەهاكانی ئازادیی رادەربڕین، وتیشی:" بڕیارماندا باری نائاسایی لە تەواوی وڵات رابگەیەنین و حەوت هەزار سەربازیش لەناو شارەكاندا بڵاودەكەینەوە بەمەبەستی پاراستنی هاووڵاتیان و ئاسایشی خوێندنگەكان و شوێنە ئاینییەكان".
سەرۆكی فەرەنسا باسی لەوەشكرد، سبەینێ هەینی ئەنجومەنی بەرگریی فەرەنسا كۆدەبێتەوەو بڕیارو رێوشوێنی نوێ رادەگەیەنێت.
ماكرۆن ئاشكرایكرد كە ئیسلامییە توندڕەوەكان دەستیان لە هێرشەكاندا هەیە، بەڵێنیشیدا هاووڵاتیانی فەەرنسا پارێزن و رایگەیاند، پێویستە فەرەنسییەكانیش بەهەموو جیاوازییەكانیانەوە یەكبگرن و چاوكراوەش بن و رێگە نەدەن توندەڕەوەكان دووبەرەكی دروستبكەن.
بەیانی ئەمڕۆ 29-10-2020، تیرۆریستێك لەشاری نیس لە فەرەنسا، بە چەقۆ هێرشیكردە سەر چەند هاووڵاتییەك و لە ئەنجامی ئەو هێرشەش سێ هاووڵاتی مەدەنی گیانیان لەدەستداو چەند كەسێكی دیكەش بریندار بوون، لەدوای رووداوەكە، هێزەكانی پۆلیسی فەرەنسا رایانگەیاند كە تیرۆریستە هێرشبەرەكەیان دەستگیركردووە.