راچڵەكین -

لە ئیسپانیا بەهۆی دەستگیركردنی هونەرمەندێكی راپ، ماوەی چوار رۆژە خۆپیشاندان بۆ ئازادكردنی دەكرێت، تائێستاش بەهۆی گرژی و ئاڵۆزییەكانەوە، 95 خۆپیشاندەر دەستگیركراون و 100 كەسیش بریندار بوون.

لەدوای دەستگیركردنی هونەرمەندی راپ پابلۆ هەسیل و سزادانی بەتاوانی سووكایەتیكردن بە سیستمی شاهانەی وڵات و بەرزنرخاندنی تیرۆریزم، لەچەندین شاری ئیسپانیا خۆپیشاندانی ناڕەزایی بەڕێوەچوو.

ئەو هونەرمەندە راپەڕەی ئیسپانیا، بەهۆی بەكارهێنانی ژمارەیەك دەستەواژە لە تویتەر و گۆرانییەكانیدا كە تیایاندا تیرۆریزمی بەرز دەنرخاند و سووكایەتی بە شاهانە و دامەزراوەكانی دەوڵەت كردبوو، بە نۆ مانگ زیندانیكردن سزادرا و لە ١٦ی شوباتدا لەلایەن پۆلیسەوە بە زۆرەملێ دەستبەسەركرا.

هەرچەندە لە مەدرید-ی پایتەخت و چەند شارێكی دیكەی ئیسپانیا، خۆپیشاندانەكان بەشێوەیەكی ئاشتیانەو دوور لە توندوتیژی بەڕێوەچوون، بەڵام لە شاری بەرشەلۆنە خۆپیشاندانەكە توندوتیژی لێكەوتەوەو خۆپیشاندەران لەسەر شێوەی گروپی بچووك، ئاگریان لە زبڵداندانەكان بەردا و بەربەستیان لەسەر رێگاكان دانا و هێزەكانی پۆلیسیشیان بەردباران كرد.

لەكاردانەوەی ئەو هەڵسوكەوتانەی خۆپیشاندەران، هێزەكانی پۆلیسی ئیسپانیا 95 خۆپیشاندەری دەستگیركرد، كە زۆربەیان لەلایەن دادگاوە ئازادكران، بەگوێرەی میدیاكانی ئەو وڵاتەش، لانی كەم 100 خۆپیشاندەر بریندار بوون.