عیراق.. رێژەی ئالودەبوون بە ماددەی هۆشبەر لەناو گەنجاندا بەرزدەبێتەوە

عێراق

پێش 2 هەفتە     ژمارەی بینراو 68

راچڵەكین –

تادێت رێژەی ئالودەبوونی گەنجان بە ماددەی هۆشبەر لە ناوچەكانی باشووری عیراق روو لە هەڵكشانی زیاتر دەكات، ئەنجوومەنی باڵای دادوەریش ئاشكرای دەكات، رێژەكە بۆ 50% بەرزبووەتەوە، هۆكارەكەشی بێكاری و كێشەی كۆمەڵایەتییە.

بە گوێرەی راگەیەنداوێكی ئەنجومەنی باڵای دادوەریی عیراق، دادوەری دادگای لێكۆڵینەوەی موسەیب لە بابل، نەبیل تائی رایگەیاندووە، رێژەی ئالودەبوون بە ماددەی هۆشبەر لەناو گەنجاندا، گەیشتووەتە 50%، بەڵام ئەم داتایە بە فەرمی یەكلایی نەكراوەتەوە.

نەبیل تائی راشیگەیاندووە، ئەو كەسانەی ماددەی هۆشبەر بەكاردەهێنن و بازرگانی پێودەكەن، لە زۆربەی ناوچەكاندا هەن، بەڵام بەزۆری و بەنزیكەی 70% لە گەڕەكە هەژازنشینەكان و ئەو ناوچانەدان كە رێژەی بیكاری تیایاندا زۆرە، لەگەڵ بوونی كێشەی كۆمەڵایەتی.

دادوەری دادگای لێكۆڵینەوەی موسەیب لە بابل ئاماژەی بەوە كردووە كە خراپی رەوشی ئابووری و زۆریی رێژەی بێكاری، هۆكارن بۆ بەكارهێنانی ماددەی هۆشبەر لەناو گەنجاندا، راشیگەیاندووە، تاوانەكانی ماددەی هۆشبەر تەنها لە پیاواندا نییە، بەڵكۆ ئەوە دەبینین كە ئافرەتانیش تێوەگلاون، گرنگترین هۆكار بۆ بڵاوبوونەوەی زیاتری ماددەی هۆشبەرەكان دەگەڕێتەوە بۆ زیادبوونی بەرهەمهێنانی ماددەی هۆشبەر لەسەر ئاستی جیهان، هەروەها مەترسیداریی تەكنۆلۆجیای گەیاندن و گواستنەوە كە رۆڵی كاریگەریان هەیە لە خێرا بڵاوبوونەوەیدا.

بەوتەی ئەو دادوەرە، داوا یاساییەكانی ماددە هۆشبەرەكان لە دادگاكاندا زۆر زۆرەو داتاكانی بەركارهێنانیش بەردەوام روو لە هەڵكشانە.

لە میانی دەیەكانی رابردوودا عیراق وەك رێڕەوێك بۆ گواستنەوەی ماددەی هۆشبەر لە ئەفغانستان و ئێرانەوە بۆ ئەورووپا و وڵاتانی كەنداوی عەرەبی سەیردەكرا.

لە دوای رووخانی رژێمی پێشووی عیراق لە ساڵی 2003دا بەهۆی ناكۆكییەكان و ناسەقامگیری رەوشی ئەمنیی و ئابووری، لە ئێستادا عیراق بووەتە بەكاربەری سەرەكیی لە جۆرە جیاوازەكانی ماددە هۆشبەرەكان.

داگرتنی ئەپی راچڵەکین بۆ ئەندۆرید

داگرتنی ئەپی راچڵەکین بۆ ئایفۆن