راچڵەكین-
سەرۆكایەتی ئەركانی سوپای ئۆكراینا رایگەیاند، لە ماوەی ٢٤ كاتژمێری رابردوودا، سوپای رووسیا ٢٠٠ سەربازی دیكەی لەدەستداوە و، تا ئەمڕۆ تێكڕا ٢٩ هەزار و ٥٠ سەربازی رووسیا كوژراون.
لە راگەیاندراوێكدا سەرۆكایەتی ئەركانی سوپای ئۆكراینا زانیاری سەبارەت بە زیانەكانی سوپای رووسیا لە ٢٤ شوبات-٢٢ی ئایار بڵاوكردەوە.
لەو راگەیاندراوەدا باس لەوە كراوە كە لە ماوەی ٢٤ كاتژمێری رابردوودا، سوپای رووسیا ٢٠٠ سەربازی دیكەی لەدەستداوە و، تا ئەمڕۆ تێكڕا ٢٩ هەزار و ٥٠ سەربازی رووسیا كوژراون و ٢٠٤ فڕۆكە، ١٧٠ هێلێكۆپتەر، هەزار و ٢٨٥ تانك، سێ هەزار و ١٤١ زرێپۆش، ٥٩٩ تۆپهاوێژ، ٢٠١ مووشەكهاوێژ و ٩٣ سیستەمی بەرگریی ئاسمانیی سوپای رووسیا تێكشكێنراون.
هەروەها لە راگەیاندراوەكەدا باس لەوە كراوە كە هێزەكانی رووسیا دوو هەزار و ١٩٤ ئۆتۆمبێلی سەربازیی، ١٣ كەشتی و بەلەمی نیمچەخێرا، ٤٧٠ فڕۆكەی بێفڕۆكەوانیان لەدەستداوە و ١٠٧ مووشەكی ئاراستەكراوی رووسەكانیش لەلایەن یەكەكانی بەرگریی ئۆكرایناوە تێكشكێندراون.
وەزارەتی بەرگریی رووسیا لە ٢٥ی ئاداری رابردوودا، بڵاویكردەوە كە هەزار و ٣٥١ سەربازیان لە ئۆكراینادا كوژراون.