راچڵەکین –
دەستەی کەشناسی و چاودێری
بوومەلەرزەی عیراق رایدەگەیەنێت، چەند ناوچەیەکی کوردستان لەسەر هێڵی بوومەلەرزەن
و رەتیشیدەکاتەوە هیچ ئاماژەیەك بۆ وشکەساڵی لەئارادابێت.
ئەمڕۆ شەممە، عامر جابری بەڕێوەبەری
راگەیاندنی دەستەی کەشناسی عیراق لە لێدوانێکیدا بۆ ئاژانسی عیراقییە رەتیکردەوە
هیچ ئاماژەیەك هەبێت لەسەر وشکبوونی هاوینی ئەمساڵ و رایگەیاند: ساڵی 2021 بە هۆی
بێ بارانییەوە ئاماژەی روون هەبوون بۆ وشکەساڵی، بەڵام لە کۆتایی 2022 و سەرەتای
2023وە بڕێکی باش باران باریوە و تەنانەت باران پێش وەرزی خۆشی دەستیپێکرد.
ئەوەشی خستەڕوو کە لە چەند رۆژی
رابردوودا بڕێکی زۆر باران لە ناوچەکانی باکوور باریوە و پێشبینیش دەکرێت لەم
مانگەدا بارانبارین بەردەوام بێت.
سەبارەت بە بوومەلەرزەش جابری
رایگەیاند: هەندێك ناوچەی وەك سلێمانی، مەندەلی، خانەقین و بەدرە لەسەر هێڵی
بوومەلەرزەن، بەڵام بوومەلەرزەی لاواز تییاندا روو دەدات و زیانی گیانی و ماددییان
نابێت.
هاوکات هەموو ئەو دەنگۆیانەشی
رەتکردەوە کە بە
ناوی پێشبینیکردنی بوومەلەرزەوە بڵاودەکرێنەوە و وتی: "پێشبینی روودانی
بوومەلەرزە ناکرێت".