راچڵەکین –
شارەزایەکی خۆراك دەڵێت، لە بازاڕەکانی کوردستاندا میوەیەك بە ناوی مۆزەوە دەفرۆشرێت، بەڵام لە راستیدا مۆز نییە، هەرچەندە بەها خۆراکییەکەشی بەرزە.

لەو بارەیەوە لەشکر حەمید، شارەزای خۆراك رایگەیاند: مۆز میوەیەکە بە ڤیتامین و کانزاکان دەوڵەمەندە، بەهای خۆراکیشی بەرزە و درێژییەکەی 15 سانتیمەترە.

بەڵام دەڵێت: لە بازاڕەکانی کوردستاندا میوەیەکی دیکە بە مۆز دەفرۆشرێت، کە لە راستیدا مۆز نییە و ناوی پلانتاینە.

هەروەك لەشکر حەمید روونیدەکاتەوە، جیاوازی پلانتاین لەگەڵ مۆز ئەوەیە، رەقترە و تامێکی تفتی هەیە، درێژییەکەشی زیاترە و دەگاتە 30 سانتیمەتر.

راشیدەگەیەنێت: هەرچەندە پلانتاینیش بەهای خۆراکیی بەرزە، بەڵام وەك مۆز نییە و لە هەندێك وڵاتیشدا سوور دەکرێتەوە، پاشان دەخورێت.

لەشکر حەمید هۆکاری فرۆشتنی ئەو میوەیە بە مۆز دەگەڕێنێتەوە بۆ جیاوازی نرخەکانیان و دەڵێت، نرخی پلانتاین هەرزانترە بۆیە بە مۆز دەفرۆشرێت.