راچڵەكین -
وەزارەتی ئاوەدانكردنەوەی عیراق رەزامەندی لەسەر دابەشكردنی زەوی نیشتەجێبوون بەسەر پێشمەرگەو كارمەندانی ئاسایش لەپارێزگای كەركوك دەدات.
ئەحمەد عومەر، بەڕێوەبەری شارەوانیی كەركوك، بە رووداوی راگەیاندووە، لەدوایین سەردانیدا بۆ بەغدا و دیداری لەگەڵ بەنگین رێكانی، وەزیری ئاوەدانكردنەوە و نیشتەجێكردنی عیراق، داواكارییەكی خستووەتە بەردەمی سەبارەت بە دابەشكردنی زەوی بەسەر كارمەندانی هێزە ئەمنییەكانی هەرێمی كوردستان وەك پێشمەرگە و ئاسایش كە خەڵكی كەركوكن و دانیشتووی شارەكەن.
بەڕێوەبەری شارەوانیی كەركوك ئاماژەی بەوەكردووە، وەزیری ئاوەدانكردنەوەی عیراق رەزامەندی لەسەر داواكارییەكە داوە كە لە كەركوك و تەواوی ناوچە دابڕێندراوەكانی تر، پێشمەرگەو كارمەندانی ئاسایش كە دانیشتووی ئەو ناوچانەن، هاوشێوەی كارمەندانی هێزەكانی ناوخۆی عیراق، زەوی نیشتەجێبوونیان بەسەردا دابەش بكرێت.