راچڵەکین-

نووسینگەی سەرۆکوەزیرانی ئیسرائیل ڕاگەیەندراوێکی لە بارەی ئاگربەستی حەماس و ئیسرائیل بڵاوکردەوە و دەڵێت، دوای هێرشەکەی ئێران، حەماس ئاگربەستی رەتکردەوە. حەماسیش ڕایگەیاند کە سوورە لەسەر خواستەکانی خۆی.

لە ڕاگەیەندراوەکەی نووسینگەی بنیامین ناتانیاهۆدا هاتووە:" یەحیا سەنوار سەرۆکی حەماس خواستی بۆ ڕێککەوتنی نوێ نیە."

ئیسرائیل حەماس بەوە تۆمەتبار دەکات کە :" دەیەوێت سوود لە گرژییەکانی ئیسرائیل و ئێران وەرگریت و گرژییەکان بۆ ناوچەکە پەلبهاوێژێت."

لای خۆیەوە حەماس رایگەیاندووە، مەرجمان بۆ ئاگربەست ئەوەیە هەمیشەیی بێت و هێزەکانی ئیسرائیل لە کەرتی غەززە بکشێنەوە.

ئەمریکا، میسر و قەتەر هەفتەی رابردوو پێشنیارێکی نوێیان بۆ مەبەستی گەیشتن بەئاگربەست و ئاڵوگۆڕی دیلەکان خستبووەڕوو.

ئەمە لە کاتێکدایە ئەمڕۆ بەپێی دوایین ئاماری وەزارەتی تەندروستی غەززە، ژمارەی کوژراوانی فەلەستین گەیشتە ٣٣ هەزار و ٧٢٩کەس. کە بەشێکی زۆریان ژن و منداڵن.