نەخۆشی گورگە سوورە
ڕاچڵه‌كین-
گورگەسوورە نەخۆشیی تێکچوونی سیستمی بەرگریی لەشە، بەجۆرێک سیستەمی بەرگری لەش بەهەڵە هێرشدەکاتە سەر خانە و شانەکانی زۆربەی ئەندامەکانی لەشی خۆمان، بەتایبەت خانە و شانەکانی پێست، جومگە، گورچیلە، مێشک، دڵ و هەروەها ئەندامەکانی دیکەیش، دكتۆر هێمن مەحموود، پزیشکی راهێنراوی نەخۆشییەکانی جومگە و ڕۆماتێزم له‌م بابه‌ته‌دا دیارترین نیشانه و هۆكاره‌كانی ئه‌م نه‌خۆشییه ڕوون ده‌كاته‌وه.
کەم نین ئەو هونەرمەند و کەسایەتییە بەناوبانگانەی کە بەدەست ئەم نەخۆشییەوە دەناڵێنن لەوانە لەیدی گاگا، سێلینا گۆمێز هەروەها نیک کانۆن و زۆری دیکە.
نیشانەکانی نەخۆشییەکە بەزۆری ئەمانەن: ئازار و ئاوسانی جومگەکان، تا، برینی ناو دەم، پەڵەی سووری پێست بەزۆری دەموچاو، قژوەرین، سنگ ئێشان، ئاوسانی لیمفەگرێکان و هەروەها بێهێزی و بێتاقەتی.
نەخۆشییەکە دوو باری توند و سوکی هەیە، زۆربەی جار سووک و سادەیە، بەڵام هەندێکجار زۆر توندە و مەترسی گەورە بۆ سەر تەندروستی دروستدەکات.
هۆکارەکانی نادیارن تاکو ئێستا، بەڵام وادەزانرێ کە هۆکاری بۆماوەیی و ژینگەیی کاریگەریی لەسەر دروستبوونی نەخۆشییەکە هەبێ، وەکو تیشکی خۆر و جگەرە کێشان و هەندێک جۆری هەوکردنی میکرۆبی(Infection)، هەروەها هۆرمۆنی ئافرەتان بۆیەش زیاتر خانمان تووشدەبن.
لەگەڵ ئەوەی کۆمەڵێک چارەسەر بەکاردەهێنرێت بۆ نەخۆشییەکە گرنگترینیان هایدرۆکسیکلۆرۆکوین و ستیرۆیدەکانن، بەڵام تاکو ئێستا چارەسەر بۆ بنبڕکردنی نەخۆشییەکە نەدۆزراوەتەوە، ئەوەی کە هەیە تەنیا کۆنترۆڵی دەکات و ڕێگریدەکات لە خراپتربوونی نەخۆشییەکە.