راچڵەکین-

بەڕێوبەرایەتی گشتیی کارەبای سلێمانی رایگەیاند، پڕۆژەی رووناکی چووەتە بواری جێبەجێکردنەوە و شەوی رابردوو کارەبای بەردەوام بۆ نزیکەی نۆ هەزار هاوبەش دابینکراوە.

ئەمڕۆ هەینی بەڕێوبەرایەتی گشتیی کارەبای سلێمانی رایگەیاند، "شەوی رابردوو لە هەردوو وێستگەی ناوەندی شار و مەڵکەندی، یەکەمین قۆناغی پرۆژەی رووناکی کارەبای ٢٤ کاتژمێری چووە بواری جێبەجێکردنەوە".

بەڕێوبەرایەتییەکە ئاماژەی بەوەش کردووە، "لەم قۆناغەدا نزیکەی (٩) هەزار هاوبەشی ماڵان و بازرگانی لەسەر (٨) فیدەر کارەبای بەردەوامیان بۆ دابینکراوە، کە دەکەونە گەڕەکەکانی سەرکارێز، توی مەلیک، سابونکەران، مەڵکەندی، ئیبراهیم پاشا، دارۆغا، حاجی حان، شەقامی ئۆرزدی و ئەسحابەسی و شەقامی کاوە".

لە راگەیاندراوەکەدا ئەوەش هاتووە، "پرۆژەی رووناکی لە سليمانی بەردەوام دەبێت و لە ئایندەیەکی نزیکدا قۆناغەکانی دیکەی لە گەڕەکەکانی دیکە دەچێتە بواری جێبەجێکردنەوە".