ڕاچڵەکین سپۆرت -

 

ڕۆبێرت لیڤاندۆڤسکی ئەستێرەی پۆڵەندی، هێرشبەری یانەی بەرشەلۆنە، ئارەزوو دەکات بۆ یارییەکەی بەرامبەر ئینتەرمیلان کە ئەمڕۆ سێشەممە ئەنجام دەدرێت، لە یاری گەڕانەوەی قۆناغی پێش کۆتایی چامپیۆنزلیگ لە یاریگای سان سیرۆ بە شێوەی سەرەکی یاریی بکات.

لیڤاندۆڤسکی لە چەند ڕۆژی ڕابردوودا لەگەڵ بەرشەلۆنە دەستی بە ڕاهێنانە کۆمەڵەکان کردەوە، دوای ئەوەی لە پێکانێکی ڕانی چەپی چاکبووەوە کە دوو هەفتە لەمەوبەر لە یارییەکەی تیپەکەی لە خولی ئیسپانیا بەرامبەر سێلتاڤیگۆ تووشی بوو.

ڕاپۆرتە ڕۆژنامەوانییەکان ئاماژەیان بەوە کردووە، هانسی فلیکی ڕاهێنەری یانەی بەرشەلۆنە مەیلی بۆ پشوودانی لیڤاندۆڤسکی بۆ یارییەکەی بەرامبەر ئینتەر هەیە و پشتی بە فێران تۆرێس بەستووە لە پێکهاتەی سەرەکیدا، هێرشبەرە پۆڵەندییەکەش لە لیستی یاریزانە یەدەگەکاندا هاتووە.

بەڵام بەپێی ڕۆژنامەی سپۆرتی ئیسپانی، لیڤاندۆڤسکی قسەی لەگەڵ فلیک کردووە، لەو ماوەیەدا چاکبوونەوەی تەواوەتی و ئامادەیی جەستەیی خۆی بۆ دەستپێکردنی یارییەکە پشتڕاستکردەوە، ئەمەش بە لەبەرچاوگرتنی یارییە چارەنووسسازەکە بۆ گەیشتن بە یاری کۆتایی چامپیۆنزلیگ.

ڕۆژنامەکە ڕوونیشیکردووەتەوە، بڕیاری کۆتایی لەسەر بەشداریکردنی لیڤاندۆڤسکی لە ئەستۆی فلیکدایە، کە ڕووبەڕووی تاکتیکی گەورە دەبێتەوە، بەتایبەتی لەگەڵ نزیکبوونەوەی یارییەکەی ئێل کلاسیکۆ بەرامبەر ڕیال مەدرید، کە بڕیارە یەکشەممەی داهاتوو لە گەڕی 35ی خولی ئیسپانیا ئەنجامبدرێت.