راچڵەكین -
هێزەكانی دژەتیرۆر لە ئۆپەراسیۆنێكی هاوبەشدا لەگەڵ دەزگای دژەتیرۆری عێراق لە سنووری پارێزگای كەركوك، ژمارەیەك تیرۆریست دەستگیر دەكەن و دەستبەسەر ژمارەیەك پارچە چەك و تەقەمەنیشدا دەگرن.
بەڕێوبەرایەتیی گشتیی دژەتیرۆر لە راگەیەندراوێكدا بڵاویكردەوە، پاڵپشت بە بەدواداچوون و زانیاریی هەواڵگری ورد، هێزەكانیان بە هاوبەشی لەگەڵ دەزگای دژەتیرۆری عێراق ئۆپەراسیۆنێكی هاوبەشیان لە سنوری پارێزگای كەركوك ئەنجامدا.
وەك لە راگەیەندراوەكەدا هاتووە، لە ئۆپەراسیۆنەكە توانرا ژمارەیەك تیرۆریست و تۆمەتبار دەستگیر بكرێن كە پێشینەیان لەناو رێكخراوی تیرۆریستی داعش دا هەبووە و لە ئێستاشدا بەشێك بوون لە شانە ناچالاكەكانی ڕێكخراوەكە و كاری گواستنەوەی كەرەستە و پێداویستی لۆجستییان كردووە بۆ پاشماوە چەكدارەكانی ئەو ڕێكخراوە.
لە ئۆپەراسیۆنەكەدا جگە لە دەستگیركردنی ئەو ژمارە تیرۆرستە، توانرا دەستبەسەر ژمارەیەك پارچە چەك و تەقەمەنیشدا بگیرێت، هەروەها دەستبەسەر ژمارەیەك مۆبایل و سیم كارت دا گیرا، كە بۆ پەیوەندی لەگەڵ ژمارەیەك تیرۆریستی دیكە بەكارهاتبوو.
دژەتیرۆر ئاماژەی بەوەشكردووە، دوای دەستگیركردن و لێكۆڵینەوە لەگەڵیان، دەستبەجێ تیرۆرستە دەستگیركراوەكان رادەستی یاسا كران بەمەبەستی گرتنەبەری ڕێكاری پێویست و یاسایی بۆ سزادانیان.