راچڵەكین -
لە دەروازەیەكی سنووری نێوان سووریا و لوبنان، شەڕو پێكدادان لەنێوان سوپای لوبنان و گروپێكی چەكداری سەر بە حكومەتی سووریا دروستبوو، بەهۆیەوە دەروازە سنوورییەكە داخرا.
روانگەی سووری بۆ مافەكانی مرۆڤ بڵاویكردەوە، ئەمڕۆ چوارشەممە 30-7-2026، لە دەروازەیەكی سنووری نێوان سووریا و لوبنان، بۆماوەیەك شەڕو پێكدادانی چەكداری لەنێوان هێزێكی سوپای لوبنان و گروپێكی چەكداری لایەنگری حكومەتی سووریا روویدا و بەهۆیەوە سەربازێكی لوبنانی بریندار بوو.
بەهۆیەوە رووداوەكە سوپای لوبنان باری نائاسایی لەناوچە سنوورییەكە راگەیاند و دەروازەكەشی بەڕووی هاتووچۆی نێوان هەردوو وڵات داخست.
بەگوێرەی ئەو زانیارییانەی كە روانگەی سووری بۆ مافەكانی مرۆڤ لە سەرچاوەیەكی ئاگادارەوە بڵاویكردووەتەوە، شەڕەكە بەهۆی رێگریی لە چەند كەسێك دروستبوو، كە دەیانویست بەشێوەیەكی نایاسایی لە سووریاوە بۆ ناو خاكی لوبنان بپەڕنەوە، ئەو كەسانە كە ناسنامەكانیان ئاشكرا نەكراوە، لەلایەن سوپای لوبنانەوە دەستگیركران و دوای ماوەیەكی كەم ئازادكران و رەوانەی سووریا كرانەوە.
لەئێستادا دۆخی ناوچە سنوورییەكە هێوربووەتەوە، ئەمەش دوای كۆبوونەوەی شاندێكی هاوبەشی سووریا و لوبنان لەسەر سنوور و چارەسەركردنی پرسی سنووربەزاندن كە ماوەیەكە پەرەی سەندووە و هاووڵاتیان لە سووریاوە هەوڵی چوونە ناو خاكی لوبنان بەشێوەیەكی نایاسایی دەدەن.