راچڵەكین-

ئەندامێكی لیژنەی دارایی لە فراكسیۆنی یەكێتی ئاماژە بەوەدەكات، نوسراوێكیان ئاراستەی سەرۆكوەزیرانی عیراق كردووە بۆ خەرجكردنی 100 هەزار دینارەكەی خانەنشینانی هەرێمی كوردستان.

ئەمڕۆ پێنجشەممە 31ی تەمووزی 2025 نەرمین مەعروف ئەندامی لیژنەی دارایی ئەنجومەنی نوێنەرانی عیراق بە میدیای فەرمی یەكێتی راگەیاندووە:" وەك فراكسیۆنی یەكێتی لە كۆبوونەوەمان لەگەڵ محەمەد شیاع سودانی سەرۆكوەزیرانی عیراق، نوسراوێكمان لە بارەی گەڕاندنەوەی 100 هەزارەكەی خانەنشیانی هەرێم ئاراستە كرد، كە بەپێی یاسای خانەنشینی یەكگرتوو پێویستە بۆیان بگەڕێندرێتەوە".

وتیشی:" سەرۆكوەزیران لای خۆیەوە نوسراوی ئاراستەی وەزارەتی دارایی فیدڕاڵی كردووە بۆ وەرگرتنی بۆچوونیان لەسەر ئەو بابەتە".

هاوكات سادق شێخ عوسمان وتەبێژی یەكێتیی خانەنشیانی كوردستان رایگەیاند:"دوای ئەوەی هەرێمی كوردستان بڕیاریدا یاسای ژمارە 9ی ساڵی 2014ی هەمواركراوی خانەنشینی یەكگرتوو جێبەجێ بكات، خانەنشینانی هەرێم هەمان مافی خانەنشینانی عیراقیان پێبڕا".

وتیشی:" پێویستە ئەو بڕە پارەیەیان پێبدرێت، هاوشێوەی خانەنشیانی عیراق و لەسەرەتای ئەمساڵیشەوە بۆیان هەژمار بكرێت".