ڕاچڵەکین سپۆرت -
بارسێلۆنا پەیوەندییەکی بەرچاوی سەبارەت بە داهاتووی مارکوس ڕاشفۆرد هێرشبەرەکەی وەرگرت، دوای ئەوەی دەرکەوت کە ناکۆکی لەناو مانچستەر یونایتددا هەیە سەبارەت بە گەڕانەوەی بۆ ئۆڵدترافۆرد.
ئەم پێشهاتە لە کاتێکدایە کە یانە کەتەلۆنییەکە بە تەواوی ڕازییە لە ئاستی یاریزانەکە لە دوای هاتنی بۆ کەتەلۆنیا، ئەمەش چانسی چالاککردنی بژاردەی کڕینی گرێبەستەکەی لە کۆتایی وەرزدا بەهێزتر دەکات.
بەگوێرەی ڕۆژنامەی سپۆرتی ئیسپانی، سەرەتای ئەم وەرزەی مارکوس ڕاشفۆرد لەگەڵ یانەی بەرشەلۆنە بە درەوشاوەیی و یەکگرتوویی دەناسرێتەوە، هێرشبەرە ئینگلیزییەکە کە هاوینی ڕابردوو بە خواستن لە یانەی مانچستەر یونایتدەوە پەیوەندی بە یانەی بارساوە کرد، لە کاتی ئامادەنەبوونی ڕافینهادا کە دووچاری پێکانبووە، ئاستێکی نایابی پێشکەشکرد و ئامارێکی سەرنجڕاکێشی تۆمارکرد.
ڕاشفۆرد، لەگەڵ ئێریک گارسیا، یەکێکە لەو دوو یاریزانەی کە لەم وەرزەدا لە هەموو یارییەکی بەرشەلۆنەدا بەشدارییان کردووە، هەروەها لە دوای ئەو بەرگریکارە ئیسپانییە پلەی دووەمی هەیە لە خولەکانی یاریکردندا.
هێرشبەرە ئینگلیزییەکە 16 یاری ئەنجامداوە و 6 گۆڵی تۆمارکردووە و 9 ئەسیستیشی کردووە.
ئەگەر ئەم ڕەوتە بەردەوام بێت، پێدەچێت ئیدارەی وەرزشی بەرشەلۆنە هەڵوێستێکی پتەوی هەبێت لەسەر چالاککردنی بژاردەی کڕین لە گرێبەستی یاریزانەکەدا.
ڕاپۆرتە ئینگلیزییەکان ئاماژە بەوە دەکەن کە بەهای بژاردەی کڕین لە نێوان 30 بۆ 35 ملیۆن یۆرۆدایە، بەڵام دیکۆ، بەڕێوەبەری وەرزشی بارسێلۆنا، پێی وایە دوو هۆکاری بەهێزی هەیە بۆ دانوستان لەسەر نرخێکی کەمتر، یەکەم: خواستی ڕوونی ڕاشفۆرد بۆ مانەوەی لە بەرشەلۆنە، لە دوای هاتنیەوە دڵخۆشییەکی بێئەندازەی خۆی لە یانەکە و لە شارەکەدا دەربڕیوە و تەنانەت لە هاوینی ڕابردوودا چاوەڕێی ئۆفەری بەرشەلۆنەی دەکرد لە کاتێکدا یانەکە هەوڵی گواستنەوەی نیکۆ ویلیامز دەدا.
هۆکاری دووەمیش ڕاستەوخۆ پەیوەندی بە هەڵوێستی مانچستەر یونایتدەوە هەیە، بەگوێرەی ڕۆژنامە ناوخۆییەکانی مانچستەر، یانەکە هیچ نیازێکی نییە ڕاشفۆرد بگەڕێنێتەوە، کە وەرزی ڕابردووش بە خواستن دای بە یانەی ئەستۆن ڤێلا.
ڕۆژنامەی مانچستەر ئیڤین نیوز دیدارێکی نێوان خاوەن یانەکە و ڕوبێن ئەمۆریمی ڕاهێنەری ئێستای ئاشکراکرد، کە تێیدا ئاگادارکرایەوە کە ئەو یاریزانە بەشێکە لە پلانەکانی بۆ وەرزی داهاتوو. لە بەرامبەردا ئەمۆریم دووپاتیکردەوە کە لە هیچ بارودۆخێکدا نایەوێت ڕاشفۆرد لە پێکهاتەکەیدا بێت.
ڕاشفۆرد 426 یاری لەگەڵ مانچستەر یونایتد ئەنجامداوە و 138 گۆڵی تۆمارکردووە، پێش ئەوەی ئەو یانەیە جێبهێڵێت کە دەستی بە ژیانی وەرزشی کردووە دوای ناکۆکی لەگەڵ ڕاهێنەرە پورتوگالییەکە.