راچڵەكین-
مەكتەبی سیاسیی یەكێتی نیشتمانی كوردستان رایدەگەیەنێت، رۆژی شەهیدی یەكێتی، رۆژی شایەتیدانە لەسەر خەباتی نەپساوەی پڕ لە قوربانیدان.
مەكتەبی سیاسی یەكێتی، لەپەیامێكدا بۆ رۆژی شەهیدی یەكێتی دەڵێت، رۆژی شەهیدی یەكێتی، رۆژی رێبازی (كەم بژی و كەڵ بژی)یە، كە پێشەنگەكانی گیانبەخشین و شەهادەت (خاڵە شیهاب و جەعفەر و ئەنوەر) بەپیریەوە چوون.
"ئەلبومی شەهادەتی یەكێتی لە دەستپێكی خەبات، تا گەشەی خەباتی پێشمەرگانە، تا راپەڕینی كوردستان و پرۆسەی رزگاریی عیراق و بەرەنگاریی تیرۆری داعش و قاعیدە و هاوسنفەكانیان، مێژوویەكی پڕشكۆ و سەروەری دەگێڕنەوە و هیوامانە چیتر گەلەكەمان ناچاری خوێنبەخشین نەبێت، ئەگەرچی یەكێتی و كورد تاسەر درێغی ناكات بۆ فیداكاری و رەنجكێشان." وەك لەراگەیەندراوەكەی مەكتەبی سیاسی یەكێتیدا هاتووە.
پەیامی مەكتەبی سیاسی بۆ رۆژی شەهیدی یەكێتی
رۆژی شەهیدی یەكێتی، رۆژی شایەتیدانە لەسەر خەباتی نەپساوەی پڕ لە قوربانیدان
رۆژی رێبازی (كەم بژی و كەڵ بژی)یە، كە پێشەنگەكانی گیانبەخشین و شەهادەت (خاڵە شیهاب و جەعفەر و ئەنوەر) بەپیریەوە چوون.
تۆماری كاروانی پەنجا ساڵەی یەكێتی و شۆڕشی نوێ پڕیەتی لە قوربانیدان و رۆژ نییە كە شەهیدێك یان پۆلێك شەهیدی تێدا نەبەخشیبێت بە نەتەوە و بە دیموكراسی و بە ئازادیی وڵات.
ئەمڕۆ بۆ یادی ئەو هاوخەبات و هاوسەنگەرانەمان، كە لە زیندانەكانی رژێمی بەعسدا بە وتنەوەی سروود و دروشمەوە چوونە بەر پەتی سێدارە، یان لە سەنگەرەكانی بەرگرییدا بەوپەڕی جوامێرییەوە سنگیان دایە بەر گولەی دوژمن و گیانیان بەخشی بە گەل و وڵات، لە ئاست رۆحی ئەو گیانبازانەدا سەری رێز دادەنەوێنین و بەڵێنی درێژەپێدانی خەباتیان دووپاتدەكەینەوە.
ئەلبومی شەهادەتی یەكێتی لە دەستپێكی خەبات، تا گەشەی خەباتی پێشمەرگانە، تا راپەڕینی كوردستان و پرۆسەی رزگاریی عیراق و بەرەنگاریی تیرۆری داعش و قاعیدە و هاوسنفەكانیان، مێژوویەكی پڕشكۆ و سەروەری دەگێڕنەوە و هیوامانە چیتر گەلەكەمان ناچاری خوێنبەخشین نەبێت، ئەگەرچی یەكێتی و كورد تاسەر درێغی ناكات بۆ فیداكاری و رەنجكێشان.
بۆ ئاسوودەكردنی رۆحی شەهیدان، بە ئەركی لێنەبڕاوانەی سەرشانمانی دەزانین گشت هەوڵێكمان زیاتر و زیاتر بخەینەگەڕ بۆ باشتركردنی ژیانی كەسوكاری سەربەرزی شەهیدان و گشت كۆمەڵانی خەڵكی كوردستان و لەسەر ئەو ئامانج و رێبازەی شەهیدان خۆیان لەپێناودا بەختكرد، ئێمەش خزمەت بكەین بۆ بەدیههێنانی گشت ئامانجەكانمان
دروود بۆ رۆح و یادی گشت
شەهیدانی یەكێتیی نیشتمانیی كوردستان و تێكرای شەهیدانی گەلەكەمان.
سڵاوی خۆڕاگریی بۆ كەسوكار و خانەوادەكانیان.
مەكتەبی سیاسی
یەكێتیی نیشتمانیی كوردستان