راچڵەكین -

وەزارەتی سامانە سروشتییەكانی حكومەتی هەرێم رایدەگەیەنێت: زۆربەی كێشە تەكنیكییەكانی بەرهەمهێنانی غاز چارەسەر كراون و هەر كاتێك دەست بە گواستنەوەی گازی سرووشتی بۆ وێستگەكانی كارەبا كرا، هاوڵاتیان ئاگادار دەكەینەوە. 

وەزارەتەكە لە راگەیەندراوێكی هاوبەشدا لەگەڵ وەزارەتی کارەبا بڵاویكردەوە، ئەمڕۆ شەممە 29-11-2025، تیمێكی هەردوو وەزارەتی سامانە سروشتییەكان و كارەبا، لەگەڵ بەرپرسانی كۆمپانیای داناغاز سەرقاڵی چارەسەركردنی كێشە تەكنیكییەكانی بەرهەمهێنان بوون، كە زۆربەی كێشەكان بەرەو چارەسەركردن چووە، بۆ ئەوەی بە زووترین كات دەست بە پرۆسەی بەرهەمهێنانی غازی سروشتی بكرێتەوە بۆ وێستگەكانی بەرهەمهێنانی كارەبا.

وەزارەتی سامانە سروشتییەكان ئاماژەی بەوەكردووە، هەر بە دەستپێكردنی بەرهەمهێنانی غاز، راستەوخۆ بۆ وێستگەكانی كارەبا دەگوازرێتەوە و هاووڵاتیانی كوردستان لە هەر پێشوەچوونێكی پرۆسەكە ئاگادار دەكەینەوە.

بەهۆی هێرشە درۆنییەكەی چەند رۆژی رابردوو بۆسەر كێڵگەی غازی كۆرمۆر، كە زیانێكی زۆری لێكەوتەوە، بەرهەمهێنانی غاز راگیرا و بەو هۆیەشەوە بەرهەمهێنانی كارەبا كەمبووەوە.