راچڵەكین - 

حكومەتی رووسیا سزا بەسەر رێكخراوی هیومن رایتس وۆچ دەسەپێنێت و دەیخاتە لیستی رێكخراوە نەخوازراوەكان.

ئەمڕۆ شەممە 29-11-2025، وەزارەتی داد-ی رووسیا لە راگەیەندراوێكدا بڵاویكردەوە، بڕیاردرا رێكخراوی هیومن رایتس وۆچ-ی ئەمریكی بخرێتە لیستی رێكخراوە نەخوازراوەكان و كارەكانیشی لەناوخۆی رووسیا قەدەغە بكرێت.

وەزارەتەكە ئاشكرایكردووە، لەمەودوا بەهیچ شێوەیەك رێگە بەو رێكخراوە ئەمریكییەی بواری مافەكانی مرۆڤ نادرێت، كارو چالاكی لەناو خاكی رووسیا ئەنجام بدات.

هەرچەندە وەزارەتی دادی رووسیا هۆكاری بڕیارەكەی ئاشكرا نەكردووە، بەڵام بەگوێرەی هەندێ سەرچاوە، بڕیارەكە لەچوارچێوەی ناكۆییەكانی نێوان مۆسكۆ و واشنتۆن دێت، بەتایبەتی كە ئەمریكا كاركردنی دەیان رێكخراو و دامەزراوەی روسیای لەناو خاكی وڵاتەكەی قەدەغە كردووە.

رێكخراوی هیومن رایتس وۆچ، كە رێكخراوێكی نێودەوڵەتی ناحكومییە، لەساڵی 1978 لە شاری نیویۆرك دامەزراوەو بایەخ بە بوارەكانی مافی مرۆڤ دەدات.