راچڵەكین -
پۆلیسی گەرمیان بڵاویكردەوە، ئەو دوو گەنجەی داری نێو باخچەكانی كەلاریان شكاند خۆیان رادەستی پۆلیس كرد.
ئەمڕۆ شەممە 29-11-2025، بەڕێوەبەرایەتی پۆلیسی گەرمیان لە راگەیەندراوێكدا بڵاویكردەوە، دوای ئەوەی لەڕۆژانی ڕابردوودا گرتەیەكی ڤیدۆیی لە تۆڕە كۆمەڵایەتییەكان بڵاوبووەوە تێیدا دوو گەنج لەنێو قەزای كەلار دارو درەختی نێو باخچەیەك دەشكێنن و كاردانەوەی ژینگەدۆستان و شارەوانیی كەلاری لێكەوتەوە، هەردوو گەنجەكە خۆیان رادەستی بنكەی پۆلیسی كەلاری كۆن كرد.
پۆلیسی گەرمیان ئاماژەی بەوەكردووە، لەئێستادا هەردوو تۆمەتبارەكە بەبڕیاری دادوەرو بەپێی مادەی 42ی ژینگە، بەندكراون و لێكۆڵینەوەش لەگەڵیاندا دەستیپێكردووە.
لەدوای بڵاوبوونەوەی گرتەی ڤیدیۆیی ئەو دوو گەنجەی كە چەند دارێكی باخچەیەكی قەزای كەلار دەشكێنن، سەرۆكایەتی شارەوانی كەلار بڕیاریدا رێكاری یاسایی لەدژیان بگرێتەبەر.