مەسرور بارزانی، سەرۆكی حكومەتی هەرێمی كوردستان

راچڵەكین -

سەرۆكی حكومەتی هەرێم لەبارەی هێرشەكەی سەر كێڵگەی غازی كۆرمۆر رایدەگەیەنێت: ئەم هێرشە نابێت بەبێ لێپرسینەوە تێپەڕێت و لەگەڵ سوودانی باسمان كردووە كە دەبێت ئەنجامدەرانی ئەم هێرشە هەر لایەن و گروپێك بن و لە هەر كوێ بن لێپرسینەوەیان لەگەڵدا بكرێت و ڕادەستی یاسا بكرێن. 

مەسرور بارزانی لە پەیامێكدا كە ئەمڕۆ شەممە 29-11-2025 بڵاویكردەوە، وێڕای سوپاسكردنی سوپاسی خەڵكی كوردستان بۆ پشوودرێژی و خۆڕاگرییان كە لە دوای هێرشە تیرۆریستییەكەی چەند رۆژی ڕابردوو بۆ سەر ژێرخانی گازی هەرێمی كوردستان، تووشی كەمیی كارەبا بوونەوە، راشیگەیاندووە لەدوای ئامادەكارییە تەكنیكییەكان، لەگەڵ كۆمپانیای دانا گاز گەیشتینە ڕێككەوتن بۆ دووبارە دەستپێكردنەوەی بەرهەمهێنان و گەڕاندنەوەی كارەبا لە چەند كاتژمێری داهاتوودا.

دەقی پەیامەكە:

سوپاسی خەڵكی كوردستان دەكەم بۆ پشوودرێژی و خۆڕاگرییان كە لە دوای هێرشە تیرۆریستییەكەی چەند رۆژی ڕابردوو بۆ سەر ژێرخانی گازی هەرێمی كوردستان، تووشی كەمیی كارەبا بوونەوە. خەڵكی نیشتیمانپەروەری كوردستان بەگشتی ئەم هێرشەیان شەرمەزار كرد كە دژی بەرژەوەندیی هەموو هاووڵاتییان بوو و بووە هۆی بڕینی كارەبای ملیۆنان كەس لە هەرێمی كوردستان و عێراقدا.

ئەمڕۆ لەدوای ئامادەكارییە تەكنیكییەكان، لەگەڵ كۆمپانیای دانا گاز گەیشتینە ڕێككەوتن بۆ دووبارە دەستپێكردنەوەی بەرهەمهێنان و گەڕاندنەوەی كارەبا لە چەند كاتژمێری داهاتوودا. لەگەڵ بەڕێوەبەرایەتی كۆمپانیاكە قسەم كرد و سوپاسی بەڕێوەبەرایەتی و گشت كارمەندەكانم كرد بۆ خۆڕاگری و ئیرادەی بەهێزیان. ئەمە یازدەمین هێرشە بۆ سەر كێڵگەكە و ئامادەیی ئەوانیش بۆ بەردەوامبوون لەسەر كارەكەیان، نیشاندەری خۆڕاگرییانە. دڵنیاشم كردنەوە كە لەگەڵ حكومەتی فیدراڵ، هەموو هەوڵێك دەدەین بۆ كۆتاییهێنان بە هێرشە تیرۆریستییەكان و بەسزاگەیاندنی ئەنجامدەرانی هێرشەكە و ڕێگەگرتن لە دووبارەبوونەوەی لە داهاتوودا. لە هەمان كاتدا لەگەڵ هاوبەشە نێودەوڵەتییەكانمان كار دەكەین لە پێناو دابینكردنی پێداویستییەكانی پاراستنی گەلەكەمان و ژێرخانی ئابووری و وەبەرهێنانمان.

ئەم هێرشە نابێت بەبێ لێپرسینەوە تێپەڕێت و نابێت هێرشەكان ببنە ڕووداوی ئاسایی. 

دیار بوو كە دوژمن و ناحەزان و بەكرێگیراوەكانیان چاویان بە پێشكەوتنی كوردستان و ئاسوودەبوونی خەڵك هەڵنایەت و بە شێوەیەكی ترسنۆكانە و نامەردانە، ئەم هێرشەیان كرد و دژی ڕووناكی وەستانەوە و هەوڵیان دا تاریكی بگەڕێننەوە. 

لەگەڵ سەرۆك وەزیرانی فیدراڵ بەڕێز محەممەد شیاع سوودانی باسمان كردووە كە دەبێت ئەنجامدەرانی ئەم هێرشە هەر لایەن و گروپێك بن و لە هەر كوێ بن لێپرسینەوەیان لەگەڵدا بكرێت و ڕادەستی یاسا بكرێن. ئەوە تاكە ڕێگرییە و چاوەڕوانین ڕێوشوێنی جیددی و كردارەكی بگیرێتەبەر. چونكە عێراق ناتوانێت وەبەرهێنانی بیانی بۆ خۆی ڕابكێشێت لە كاتێكدا میلیشیا و گرووپە چەكدارییە لە یاسا دەرچووەكان و مافیا گەندەلەكان بە بێ هیچ سزا و لێپێچینەوەیەك، هێرش بكەنە سەر ژیرخانی ئابووری وڵات و دڵیان بە ئازاری خەڵكی كوردستان خۆش بكەن.

سوپاسی تیمی تەكنیكیی هەردوو وەزارەتی سامانە سروشتییەكان و وەزارەتی كارەبا و هێزە ئەمنییەكان دەكەم بۆ كاركردن و ماندووبوونیان لە چەند ڕۆژی ڕابردوودا.  

دووپاتی دەكەینەوە، ئەم هێرشە ترسنۆكانە لە باشتركردنی ژیانی هاووڵاتیان نامانوەستێنن. ئێمە بەردەوام دەبین لە كاركردن و درێژەدان بە كاروانی پێشكەوتن و ئاوەدانی و داوا لە خەڵكی كوردستان دەكەم بەردەوام بن لە پشتگیریكردنی حكومەتەكەیان.

مەسرور بارزانی
سەرۆكی حكومەتی هەرێمی كوردستان