راچڵەكین -
زریانێكی بەهێز سریلانكای گرتەوەو لافاو و رۆچوونی زەوی بەدواداهات، بەپێی ئامارەكانیش ژمارەی قوربانیان بۆ 153 كەس بەرزبووەتەوەو سەدان كەسیش بێ سەروشوێنن.
سەنتەری ئیدارەكانی كارەساتەكان لە سریلانكا بڵاویكردەوە، لەئەنجامی زریانی دیتواە، كە بەشێكی زۆری وڵاتەكەی گرتەوە، لەوانەش شاری كۆلۆمبۆی پایتەخت، لافاو لەچەندین شار دروستبوو، بەهۆیەوە تائێستا 153 كەس گیانیان لەدەستداوەو سەدان كەسیش بیچ سەروشوێنن، هاوكات زیاتر لە 500 هەزار كەسیش زیانمەند بوون بەناچاری ماڵ و حاڵیان جێهێشتووە.
هاوكات لەچەند ناوچەیەكیش بەهۆی بەهێزیی زریان و لافاوەكە، رۆچوونی زەوی روویداوەو بەشی زۆری ناوچەكانی پایتەختی سریلانكاش ژێرئاو كەوتوون و تەزووی كارەباش پچڕاوە.
بەرپرسانی سریلانكا رایانگەیاندووە، ئەم زریانە بە یەكێك لە بەهێزترین كارەساتە سروشتییەكان دادەنرێت كە لەماوەی زیاتر لە 50 ساڵی رابردوودا رووبەڕووی وڵاتەكەیان بووبێتەوە، چاوەڕوانیش دەكرێت بە درێژایی ئەم هەفتەیە بارانبارینی بەخوڕ لەزۆربەی ناوچەكانی وڵاتەكە بەردەوام بێت، ئەمەش مەترسی زیانە گیانییەكانی زیاتر كردووە.
دەسەڵاتدارانی سریلانكا باری نائاساییان لەناوچە زیانلێكەوتووەكانی لافاوەكە راگەیاندووە و سەدان تیمی فریاگوزارییش سەرقاڵی رزگاركردنی هاووڵاتیان و گەڕان بەدوای بێ سەروشوێنەكاندان.