راچڵەكین -
وەزارەتی ناوخۆی حكومەتی هەرێم، رووداەوەكەی ئەمڕۆی گوندی لاجان-ی سنووری هەولێر بە كارێكی ئاژاوەگێڕی وەسفدەكات و هۆشدارییش دەدات كە چیتر رێگە نادەن سوود لە نیازپاكیی دامو دەزگاكانی هەرێمی كوردستان وەربگیرێت و سنوورێك بۆ ئەو كارە تێكدەرانە دادەندرێت.
وەزارەتەكە لە راگەیەندراوێكدا بڵاویكردەوە، "ماوەیەكە لەلایەن چەند دەستێكی دەرەكی و بە فیتی هەندێك كەس و لایەنی ناوخۆیی، هەوڵی نانەوەی ئاژاوە دەدرێت، نوێترین هەوڵی تێكدەرانە بە بەئامانجگرتنی كێڵگەی غازی كۆرمۆر دەستی پێكرد كە مەبەست لێی راگرتنی بەرهەمهێنانی كارەبای هەرێم بووە. دوای ئەوەش حكومەتی هەرێمی كوردستان سووتەمەنیی شلی وەك جێگرەوەی غاز بۆ دابینكردنی كارەبا بەكارهێنا، بە هاندانی ناوخۆیی و دەرەكی، كۆمەڵە كەسێكی ئاژاوەگێڕ رێگای تانكەرەكانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بە سەر خەڵك و رێبوارانی ئەو رێگایەدا كرد".
وەزارەتی ناوخۆ ئاماژەی بەوەكردووە، لە ئەنجامی تەقەی ئەو كەسانەدا، هاووڵاتییەك بووە قوربانی و گیانی لەدەستدا و ژمارەیەك كەسی تریش بریندار بوون.
وەزارەتەكە هۆشداریی ئەوەیداوە كە "چیتر رێگە نادەین سوود لە نیازپاكیی دامو دەزگاكانی هەرێمی كوردستان وەربگێرێت و سنوورێك بۆ ئەو كارە تێكدەرانە دادەندرێت. بۆ راگرتنی ئەو جۆرە ئاژاوەگێڕییانە، بە پێی یاسا بەركارەكان لە هەرێمی كوردستان مامەڵە لەگەڵ كەسانی ئاژاوەگێڕ دەكرێت و كەس لە سەرووی یاسا نییە".