راچڵەكین-

ئەنجوومەنی سیاسی نیشتمانی سوننەكانی عیراق هەنگاوەكانی دیاریكردنی كاندیدی پۆستی سەرۆكی ئەنجوومەنی نوێنەران خێراتر دەكات، كاندیدێك كە لەلایەن سیاسییەكانەوە پەسەندكراو بێت.

ئەمڕۆ یەكشەممە 30ی تشرینی دووەمی 2025 عەممار عەزاوی، ئەندامی هاوپەیمانی سیادە بە رۆژنامەی سەباح-ی نیمچەفەرمی راگەیاندووە:" ئەنجوومەنەكە مەرجەعی سەرەكی هێزە سوننەكانە، دەستنیشانكردنی كاندیدی پۆستی سەرۆكی ئەنجوومەنی نوێنەران لەسەر بنەمای دیدگایەكی ستراتیژی و تەوافوقی دەبێت، بۆ گەرەنتیكردنی نوێنەرایەتییەكی نموونەیی و بەشدارییەكی كارا لە دیاریكردنی كارە لەپێشینەكانی پەرلەمان."

رۆژی 23ی تشرینی دووەمی ئەمساڵ، هێزو هاوپەیمانی و لایەنە سوننەكانی براوەی هەڵبژاردنی ئەنجوومەنی نوێنەرانی عیراق، پێكهێنانی ئەنجوومەنی سیاسی نیشتمانیان راگەیاند بەئامانجی:" یەكخستنی دیدو هەڵوێستەكان بەرامبەر دۆسێ نیشتمانییەكان و بەردەوامی كاری هاوبەشی نێوان سەركردایەتی و كوتلە سیاسییە سوننەكان." وەك لەراگەیەندراوێكی ئەندامانی ئەنجوومەنەكەدا هاتووە.

محەممەد حەلبووسی، سەرۆكی پارتی تەقەدووم، خەمیس خەنجەر، سەرۆكی هاوپەیمانیی سەروەری، موسەننا سامەڕایی، سەرۆكی هاوپەیمانیی عەزم، بەدرە فەحل، پارێزگاری سەلاحەدین، سابت عەباسی، سەرۆكی هاوپەیمانیی حەسم ئەندامانی ئەنجوومەنەكەن.