راچڵەكین-

بەڕێوەبەرایەتی گشتی هاتوچۆی هەولێر رایدەگەیەنێت بۆ ڕێگریكردن لە گرفتەكانی تایبەت بە پڕكردنەوەی گرێبەستی ئەلیكترۆنی، بڕیاردراوە، كاتی كاراكردنی ئەو خزمەتگوزاریە گۆڕانكاری بەسەردا بێت.

ئەمڕۆ یەكشەممە 30ی تشرینی دووەمی 2025 هاتوچۆی هەولێر بڵاویكردووەتەوە،  وەك لای هەمووان ئاشكرایە ئەنجام دانی گرێبەستی ئەلیكترۆنی لە كاتی مامەڵەی كڕین و فرۆشتنی ئۆتۆمبێل كارێكی باش بو لەلایەن وەزارەتی ناوخۆ بڕیاری لەسەر درا بۆ زامن كردنی مافی یاسایی كریار و فرۆشیار لەكاتی مامەڵەی كڕین و فرۆشتنی ئۆتۆمبێل كە ئەم ئەركە بەكەس و لایەنی شارەزاو تایبەت مەند سپێردرا بۆ ئەنجام دانی ئەم گرێبەستە .

" هەندێك كەس ئەم هەنگاوەیان قۆستەوە بۆ بەرژەوندی مادی خۆیان كە هەستان بە ئەنجامدانی ئەم گرێبەستە بۆ كریار و فرۆشیاران لەناو كابینە هەندێك جار لەناو ئۆتۆمبێل لە سەرشەقامە كان و كەسانێكیش چاو ساغی و دەلالیان بۆ دەكردن كە هەم سیمایەكی ناشارستانی بو هەم ئیستغلالی هاوڵاتیان دەكرا. " وەك هاتوچۆی هەولێر ئاماژەی پێكردووە.
ئەوەی جێگای سەرنجە كەسانێكی ناشارەزا گرێبەستەكەیان ئەنجام دەدا كە زۆرترین هەڵەیان ئەنجام دەدا لە كاتی پركردنەوەی گرێبەستەكە، كەلەئەنجامدا هاوڵاتی تووشی كێشە دەبوو . دەبوایە گرێبەستەكە هەڵبەوەشێنێتەوە دووبارە گرێبەستێكی تر ئەنجام بداتەوە . كە كاتێكی زۆری بەفێڕو دەڕۆیشت و زیانی مادیشی پێدەگەیشت.

هاتوچۆی هەولێر بۆ دووبارە ڕێكخستنەوەی گرێبەستی ئەلیكترۆنی بڕیاریداوە، پڕكردنەوەی گرێبەستی ئەلیكترۆنی لەدوای كاتژمێر 2:00ی پاشنیوەڕۆ كارا بكرێت بۆ ڕێگەگرتن لەو گرفتانەی ڕوویان دەدا.

هەروەك داوا لەهاوڵاتیان كراوە، گرێبەستی ئەلیكترۆنی لە شوێنە تایبەتمەندەكان و لای كەسانی شارەزا ئەنجام بدەن.