راچڵەكین-
بەرپرسانی ئەمریكاو ئۆكراینا لەشاری میامی گفتوگۆكانیان لەبارەی پلانەكەی دۆناڵد ترەمپ بۆ ئاشتی نێوان مۆسكۆو كیێڤ دەستپێدەكەن.
پێگەی ئاكسیۆس، بڵاویكردوەتەوە، واشنتۆن و كیێڤ كاردەكەن بۆ دانانی خاڵ لەسەر پیتەكانی لێكتێگەیشتنێك لەبارەی پلانە ئاشتییەكەی ئەمریكا تا ببێتە جێی رەزامەندی كێیڤ.
بڕیارە رۆستەم عومەرۆڤ-ی وەزیری بەرگری ئۆكراینا لەگەڵ هەریەك لە ماركۆ رۆبیۆ- وەزیری دەرەوەی ئەمریكاو ستیڤ ویتكۆڤ-ی نێردەی تایبەتی ئەمریكا لە میامی كۆبێتەوەو كار لەسەر پلانەكەی ترەمپ بكەن.
ئەو گفتوگۆیانە لەكاتێكدا دێت، بڕیارە رۆژی سێشەممەی داهاتوو،ستیڤ ویتكۆڤ سەردانی مۆسكۆ بكات و لەگەڵ ڤلادیمێر پوتن-ی سەرۆكی رووسیا كۆبێتەوەو پلانی ئاشتی ئەمریكای بۆ شی بكاتەوە، لەكاتێكدا كۆشكی سپی دەیەوێت بۆچوونی مۆكسۆو كیێڤ لەبارەی هەردوو بابەتی زەوی و گرەنتییە ئەمنییەكان لێك نزیك بكاتەوە.